Мець бы мне крыллі саколія,
Мець бы мне волю зарніцаў,
К нізям не рваўся б ніколі я.
З высі б глядзеў на зямліцу.
11 студзеня 2011 года ў 15.00у Дзяржаўным літаратурным музеі Янкі Купалыадбудзецца прэс-канферэнцыя, прымеркаваная да выхаду альбома “Шчаслівасць” Беларускага дзяржаўнага ансамбля “Песняры”. Песні з новага альбома пакладзены на вершы народнага паэта Беларусі Янкі Купалы. Ансамбль “Песняры” звярнуўся да ранніх вершаў паэта, якія ўвайшлі ў яго першы зборнік “Жалейка”, што ў 1908 годзе стаў паэтычным адкрыццём Беларусі.
Творчасць Янкі Купалы – крыніца, якая жывіць і наталяе розныя пакаленні кампазітараў, музыкантаў, выканаўцаў. На словы Янкі Купалы напісана больш за 200 музычных твораў. Многія з якіх прагучалі ў выкананні “Песняроў”. Сярод іх вызначаецца песня-прытча “Песня пра долю”, рок-опера “Гусляр”, дзве праграмы У. Мулявіна на словы Янкі Купалы “Я нясу вам дар” і “Праграма песен і рамансаў на словы Янкі Купалы”. Гэтыя творы прагучалі ў 56 краінах свету.
З самага пачатку “Песняры” імкнуліся быць ансамблем для ўсіх. Людзей старэйшага пакалення вабіла магчымасць пачуць любімыя народныя песні, цудоўны вакал, моладзь – напружаныя рытмы, арыгінальнасць трактоўкі песеннай спадчыны, новыя для тых часоў музычныя формы. Творчасць Купалы для “Песняроў” стала стрыжнёвай.
Беларускі дзяржаўны ансамбль “Песняры” працягвае традыцыі, закладзеныя У.Мулявіным і зноў, і зноў звяртаецца да творчасці класіка беларускай літаратуры Янкі Купалы. Новы музычны альбом “Шчаслівасць” таму яскравае пацверджанне.
01/09/2011 | 
Author: 
Рубрыка: 
