Архіў падзей

23.09.2016
АДБЫЛОСЯ АДКРЫЦЦЁ ВЫСТАВЫ ФАТАГРАФІЙ МІХАСЯ МІЦКЕВІЧА «МІЛЫЯ ВОБРАЗЫ»

На выставе прадстаўлены фатаграфіі з асабістага архіва Міхася Міцкевіча – унікальныя здымкі, на якіх мілыя воку краявіды і мілыя сэрцу абліччы бацькі, Якуба Коласа, крэўных і сяброў.

Міхась Канстанцінавіч Міцкевіч, унук лесніка і сын паэта, з атэстатам выдатніка скончыў дзесяцігодку ў 1943 г. ў Ташкенце, дзе сям’я жыла ў эвакуацыі да вяртання ў 1947 г. ў Мінск. У 1949 г. скончыў Беларускі політэхнічны інстытут (цяпер БНТУ) і працаваў у Фізіка-тэхнічным інстытуце Нацыянальнай акадэміі навук. Аўтар 150 навуковых прац і звыш 20 вынаходніцтваў. За распрацоўкі ў галіне тэхналогіі і абсталявання для электраэразійнай апрацоўкі металаў узнагароджаны Дзяржаўнай прэміяй БССР (1980). Доктар тэхнічных навук (1985).

Міхась Міцкевіч – аматар палявання і, невыпадкова, майстар спорту СССР па стэндавай стральбе, якая мае вытокі ў сярэднявечных спаборніцтвах паляўнічых.

Аўтар бліскучых эпіграм, Міхась Міцкевіч дае трапныя, тонкага і добрага гумару подпісы да фотаздымкаў, якія захоўваюць шматлікія шчаслівыя моманты жыцця яго бацькі, Якуба Коласа, цесця Янкі Маўра, крэўных і сяброў. Яго захапленне майстэрствам фатаграфіі пачалося ў 1940 годзе. Першым фотаапаратам стаў шырокафарматны Zeiss Ikon, які Якуб Колас прывёз з Парыжа. Гэты фотаапарат Міхась Міцкевіч вывез з Мінску падчас вайны і цяпер ён экспануецца ў Дзяржаўным літаратурна-мемарыяльным музеі Якуба Коласа.

На пытанне, чаму яго захапіла фотамастацтва, Міхась Міцкевіч адказвае: “Зробіш фотаздымак, прыемна, калі гэта застанецца ў памяці”. “Мілыя вобразы” – яшчэ адна старонка гісторыі беларускай дакументальнай і сюжэтнай фатаграфіі і падарунак усім аматарам беларускай культуры.

Выстава фатаграфій Міхася Міцкевіча “Мілыя вобразы” працуе з 24 верасня па 15 кастрычніка 2016 года ў Дзяржаўным літаратурным музеі Янкі Купалы па адрасе вул. Янкі Купалы, 4.

 

22.09.2016

ПРЭЗЕНТАЦЫЯ КНІГІ ТАМАРЫ БУНТА «ДЗЯЎЧЫНКА З ВІШНЁВАГА ЗАВУЛКА»

22 верасня 2016 года а 17-й гадзіне ў Дзяржаўным літаратурным музеі Янкі Купалы адбылася прэзентацыя кнігі Тамары БУНТА “Дзяўчынка з Вішнёвага завулка”, якая выйшла ў 2016 годзе ў выдавецтве “Мастацкая літаратура”.

Гэта зборнік апавяданняў для дзяцей, у якіх аўтар з цёплай усмешкай прыгадвае вясёлыя і сумныя гісторыі свайго дзяцінства. Падзеі адбываюцца ў невялікім беларускім горадзе напрыканцы 1960-х – на пачатку 1970-х гадоў. Кніга прызначана для дзяцей сярэдняга школьнага ўзросту.

У 2014 годзе  рукапіс кнігі Тамары Бунта “Дзяўчынка з Вішнёвага завулка” атрымаў ІІ прэмію (І прэмія не прысуджалася) у літаратурным конкурсе ГА “Саюза пісьменнікаў Беларусі”, у намінацыі “Дзіцячая літаратура”.

Тамара Пятроўна Бунта – вядомы журналіст, працавала ў розных беларускіх выданнях. У 2003 – 2014 гадах была галоўным рэдактарам часопіса жанчын Беларусі “Алеся” (былая назва – “Работніца і сялянка”). З’яўляецца аўтарам шматлікіх артыкалаў, прысвечаных тэме дзяцінства, мацярынства, грамадскай дзейнасці жанчын. Стваральнік цыкла сямейных гісторый “Вядомыя людзі Беларусі вачамі родных і блізкіх”. Узнагароджана Знакам “Выдатнік друку Беларусі”.

Член ГА “Саюз пісьменнікаў Беларусі”, член ГА “Беларускі саюз журналістаў”, член прэзідыума ГА “Беларускі саюз жанчын”. З’яўляецца старшынёй Клуба творчых жанчын “Спадарыня”, створанага пры СПБ.

 04.09.2016

Фотарэпартаж з Дня беларускага пісьменства ў г. Рагачоў

Дзяржаўны літаратурны музей Янкі Купалы ў школе мастацтваў г. Рагачоў прадставіў выстаўку «Завуся я толькі Янка Купала».

01.09.2016

1 верасня — Дзень ведаў — галоўнае свята ўсіх школьнікаў. З гэтага свята стартуе ў школах новы навучальны год. Дзень ведаў — гэта першыя званкі і хваляванні, мора кветак і белых бантаў, для многіх мінскіх школьнікаў стаў традыцыйным і паход у музей.

 

25.08.2016
 Адкрыццё выстаўкі “Над Іматрай”

Адкрыццё выстаўкі адбылося ў рамках урачыстай прэзентацыі кнігі “Беларусь – Фінляндыя: у гадзіне палёту”. Яе аўтар – Уладзімір Дражын, Надзвычайны і Паўнамоцны Пасол Рэспублікі Беларусь у Літоўскай Рэспубліцы і Фінляндскай Рэспубліцы ў 2006–2014 гадах.У якасці завяршальнага акорда для сваёй кнігі-фотаальбома беларускі дыпламат абраў верш “Над Іматрай”. На стварэнне гэтага верша Янку Купалу натхніла паездка ў Фінляндыю, якую паэт здзейсніў у 1910 годзе.

Літаратурна-дакументальная выстаўка “Над Іматрай” дае магчымасць удзельнікам мерапрыемства пазнаёміцца з малавядомай старонкай у жыцці і творчасці Янкі Купалы – вандроўкай па Фінляндыі. Спадарожнічалі паэту выдатныя дзеячы нацыянальнага адраджэння Браніслаў Эпімах-Шыпіла і Антон Грыневіч. Першымі пра маршрут падарожжа даведаліся са старонак любімай газеты сучаснікі Янкі Купалы – чытачы “Нашай Нівы”. Нататкі “З Фінляндыі” праз гады захоўваюць захапленне паэта і яго сяброў мясцовым ладам жыцця і хараством краявідаў.
Пад час грамадска-культурнай акцыі “Чытаем Купалу разам” прадстаўнікі дыпламатычнага корпусу, акрэдытаванага ў Фінлядыі, і беларускай дыяспары г. Хельсінкі прачытлі цудоўныя ўзоры купалавай лірыкі кахання. Безумоўна, цэнтральным творам акцыі стаў верш, прысвечаны вадаспаду Іматра на рацэ Вуокса – маляўнічай мясціне, якая ўзрушыла і натхніла Янку Купалу.

                                                                    На поўначы сумнай, у Фіншчыне дзіўнай,

                                                                    Ракой з вадаспадам заліўся пакат;

                                                                    Вуоксаю рэчка завецца у фінаў,

                                                                    Іматрай завуць вадаспад.

                                                                    Клакочуць, рагочуць Іматрыны хвалі,

                                                                    На цэлыя вёрсты шум-гоман стаіць,

                                                                    Нем толечы каменны бераг, як з сталі,

                                                                    I зараснік хвойны маўчыць.

                                                                                                    Янка Купала, 1910

ДАЛУЧАЙСЯ ДА ПРАЕКТА “СВАЕ ГІСТОРЫІ” І СТАНЬ УДЗЕЛЬНІКАМ ВЫСТАВЫ!

Праз фатаграфію Марына Бацюкова наладжвае камунікацыю з мінулым. Адсутнасць дакладных фактаў з жыцця персанажаў дазваляе апусціць гістарычную праўду дат і біяграфій, адкрываючы магчымасць для глядацкіх фантазій. Серыя сапраўды пра мінулае – уяўнае, але персаніфікаванае. У кожнага, хто глядзіць на гэтыя фотаздымкі, узнікаюць свае гісторыі.

Далучыцца да праекта “Свае гісторыі” і стаць удзельнікам выставы проста: змяшчайце адпаведны фотаздымак на аднайменнай старонцы Facebook «Марына Бацюкова. Свае гісторыі». Аўтары трох лепшых здымкаў пад час фінісажу 20 верасня атрымаюць падарунак — фотакнігу СВАЕ ГІСТОРЫІ.

25.08.2016

25 жніўня 2016 года а 18-й гадзіне Дзяржаўны літаратурны музей Янкі Купалы запрашае на ўрачыстую прэзентацыю фотапраэкта Марыны Бацюковай «Свае гісторыі». Фотавыстаўка будзе працаваць з 26 жніўня па 20 верасня 2016 года па адрасе: Мінск, вул. Янкі Купалы, 4.

«Купалаў фэст — 2016» у Радашковічах
09.07.2016
ВЯЗЫНКА

З 1972 года кожнае лета напачатку ліпеня Вязынка збірае сяброў, каб адсвяткаваць Дзень нараджэння першага народнага паэта Беларусі Янкі Купалы.

Выкарыстаны фотаздымкі Дзяржаўнага літаратурнага музея Янкі Купалы, Наталлі Купрэвіч, Міхаіла Крыжаноўскага.

07.07.2016
ФОТАЗДЫМКІ З МЕРАПРЫЕМСТВА «ТРАДЫЦЫЙНЫ МУЗЫЧНА-ЛІТАРАТУРНЫ ЗВАРОТ ДА ТВОРЧАСЦІ ЯНКІ КУПАЛЫ І ЎСКЛАДАННЕ КВЕТАК ДА ПОМНІКА ПЕСНЯРУ»

Традыцыйна ў дзень нараджэння Янкі Купалы каля помніка паэта збіраюцца тыя, хто жыве “З Купалам у сэрцы”. Гэта беларускія паэты, мастакі, барды, даследчыкі, музейшчыкі, а таксама прыхільнікі Купалавай творчасці.

Акцыя “Чытаем Купалу разам” прайшла з удзелам ФК «БАТЭ»

ФК “БАТЭ” прыняла ўдзел у грамадска-культурнай акцыі “Чытаем Купалу разам”. Трэнер Аляксандр Ермаковіч і члены каманды прачыталі ўрыўкі з паэмы Янкі Купалы “Барысаў”. Да 100-годдзя вянчання Янкі Купалы і Уладзіславы Станкевіч  форвард каманды Віталій Радзівонаў прадэкламаваў верш паэта “Мая жонка”.

 

28.06.2016
Жальбіны. Фотарэпартаж

Жальбіны з нагоды 74-й гадавіны смерці народнага паэта Беларусі Янкі Купалы. Ля магілы Песняра адбылося жалобнае набажэнства, ускладанне кветак, прагучалі вершы-прысвячэнні Янку Купалу.

 

21.06.2016 
Фотаздымкі з мерапрыемства «Купалава ноч у Купалавым доме»

 

Праграма Купалаўскіх дзён

21 чэрвеня (аўторак)

«Купальская ноч у Купалавым доме»

У праграме:

19.00 – 19.40 – інтэрактыўная гульня-віктарына “У пошуках папараць-кветкі” (па залах музея);

19.40 – 21.00 – “Купальская містэрыя” ад гурта “Талака” пад кіраўніцтвам В.В.Калацэя і Т.А.Пладуновай кафедры этналогіі і фальклора Беларускага дзяржаўнага ўніверсітэта культуры і мастацтва;

— майстар-клас па пляценні купальскіх вянкоў;

— майстар-клас па старадаўніх песнях і танцах.

 

28 чэрвеня (аўторак)

16.00 – Жальбіны з нагоды 74-й гадавіны смерці народнага паэта Беларусі Янкі Купалы.

Ля магілы Песняра адбудзецца жалобнае набажэнства, ускладанне кветак, прагучаць вершы-прысвячэнні Янку Купалу.

18.30 – Святая імша ў Архікафедральным касцёле Імя Найсвяцейшай Панны Марыі з нагоды 74-й гадавіны смерці народнага паэта Беларусі Янкі Купалы.

7 ліпеня, чацвер

Традыцыйны музычна-літаратурны зварот да творчасці Янкі Купалы “Палымянае слова Паэта” і ўскладанне кветак да помніка Песняру.

У дзень нараджэння Янкі Купалы каля помніка паэта збіраюцца тыя, хто жыве “З Купалам у сэрцы”. Гэта беларускія паэты, мастакі, барды, даследчыкі, музейшчыкі, а таксама прыхільнікі Купалавай творчасці.

9 ліпеня, субота

Традыцыйнае свята паэзіі, песні і народных рамёстваў “З адною думкаю аб шчасці Беларусі…”

Да 134-гадавіны з дня нараджэння паэта музей ладзіць святочную праграму сумесна з Саюзам пісьменнікаў Беларусі, Маладзечанскім райвыканкамам, Асацыяцыяй “Прафесіяналы фларыстыкі і кветкавага бізнэса”, пры падтрымцы медыцынскай лабараторыі “СІНЭВО”.

Вязынка – калыска паэта: тут, у адным з найпрыгажэйшых куткоў Міншчыны, нарадзіўся Іван Дамінікавіч Луцэвіч. З 1972 года кожнае лета ў пачатку ліпеня Вязынка збірае сяброў, каб адсвяткаваць дзень нараджэння Янкі Купалы.

10 ліпеня, нядзеля

Купалаў фэст 

У праграме:

Святая імша ў касцёле Святой Тройцы ў Радашковічах, дзе хрысцілі маленькага Яся Луцэвіча, акцыя “Чытаем Купалу разам” (лірыка кахання), мультымедыйная прэзентацыя “Ісці супольна праз усё жыццё”, прысвечаная 100-годдзю з дня вянчання Янкі Купалы і Уладзіславы Станкевіч, віктарына па жыцці і творчасці Янкі Купалы, канцэрт беларускай музыкі.

 

09.07.2016
9 ліпеня 2016 года ў Купалаўскім мемарыяльным запаведніку «Вязынка» адбудзецца традыцыйнае свята паэзіі, песні і народных рамёстваў «З адною думкаю аб шчасці Беларусі…»

Свята музей ладзіць сумесна з Саюзам пісьменнікаў Беларусі, Маладзечанскім райвыканкамам, Асацыяцый «Профессионалы флористики и цветочного бизнеса», пры падтрымцы медыцынскай лабараторыі «СІНЭВО».

Вязынка – незвычайна прыгожае месца з сапраўдным нацыянальным каларытам. Тут, у адным з найпрыгажэйшых куткоў Міншчыны, нарадзіўся Янка Купала (Іван Дамінікавіч Луцэвіч). З 1972 года кожнае лета напачатку ліпеня Вязынка збірае сяброў, каб адсвяткаваць Дзень нараджэння першага народнага паэта Беларусі Янкі Купалы.

Да 134-годдзя падрыхтавана святочная праграма, падчас якой можна будзе пачуць вершы-прысвячэнні Янку Купалу з вуснаў сучасных паэтаў, адчуць мілагучнасць мовы Песняра ў вершах, пакладзеных на музыку Уладзімірам Мулявіным, у выкананні Андрэя Скарынкіна, атрымаць асалоду ад выступлення фальклорнага гурта «GUDA», фальклорнага гурта Полацкага дзяржаўнага ўніверсітэта «Варган» і фальклорнага-этнаграфічнага калектыва «Маркаўчанка» (Маладзечна).

Ужо ў чацвёрты раз у межах літаратурнага фестывалю будзе праведзены «Кветкавы этнафестываль у Янкі Купалы», які арганізуе Асацыяцыя «Профессионалы флористики и цветочного бизнеса». Галоўнай падзеяй Кветкавага этнафестывалю стане конкурс купальскіх вянкоў і букетаў «Купальская Краса» і дзіцячы фларыстычны конкурс «Купальская Красачка». Госці свята ўбачаць унікальныя і непаўторныя вобразы, створаныя прафесійнымі фларыстамі на высокім мастацкім узроўні.

Кожны, хто завітае на этнафестываль, зможа паўдзельнічаць у майстар-класе ад прадстаўнікоў Школы прафесійнай фларыстыкі «Арт Лаб» і міжнародных курсаў фларыстыкі «RozaAzora», а для маленькіх наведвальнікаў будзе працаваць школа малявання «Eleven-o-four» і дзіцячая інтэрактыўная пляцоўка. Усе жадаючыя змогуць паўдзельнічаць у пляценні купальскага вянка – сёлета ён будзе яшчэ большым – 4,5 метры ў дыяметры(!) – і стаць часткай самага вялікага спяваючага карагода!

Арганізатары запрашаюць наведаць кірмаш рамёстваў, прадэгуставаць стравы традыцыйнай беларускай кухні, завітаць у міні-лабараторыю “СІНЭВО”, прыняць удзел у традыцыйных танцах і гульнях ад фальклорнага гурта «Варган».

Свята ў Вязынцы стане выдатным днём для сямейнага адпачынку, а шматлікія ўпрыгожаныя кветкамі фотапляцоўкі прадставяць магчымасць зафіксаваць яго не толькі ў памяці.

УВАГА! Пачатак «Кветкавага этнафестывалю» – 10-00,

Пачатак свята паэзіі і песні – 12-00,

Збор на спяваючы карагод – 17-00,

Спуск на ваду самага вялікага купальскага вянка – 17-30.

 

10.07.2016
Запрашаем на Купалаў фэст у Радашковічах!

Праграма мерапрыемства:

10.00 – 11.00 – Святая Імша ў касцёле Cвятой Тройцы

11.10 – 11.30 – «Ісці супольна праз усё жыццё», мультымедыйная прэзентацыя да 100-годдзя вянчання Янкі Купалы і Уладзіславы Станкевіч

11.30 – 12.00 – «Чытаем Купалу разам»: чытанне вершаў Янкі Купалы пра каханне ўсімі жадаючымі

12.00 –12.30 – віктарына «Ці ведаеш гэта пра Купалу?»

12.30 – 12.45 – перапынак на гарбату і каравай

12.45 – 13.45 – канцэрт (цымбалы, Алесь Камоцкі, Андрусь Такінданг, «Балцкі субстрат»)

13.45 –15.00 – крыжаванка «Беларускае вяселле» і заключны акорд:

Майстар-клас па народных вясельных танцах

15.00 – Малітва на завяршэнне ў касцёле.

21.06.2016
Купальская ноч у Купалавым доме

Купальская ноч заўсёды лічылася часам цудаў: толькі ў гэтую ноч быццам бы расцвітала чарадзейная папараць-кветка, паданне пра якую ўвасобіла мару чалавека пра шчаслівае жыццё.

Купальская ноч заўсёды лічылася часам цудаў: толькі ў гэтую ноч быццам бы расцвітала чарадзейная папараць-кветка, паданне пра якую ўвасобіла мару чалавека пра шчаслівае жыццё.

21 чэрвеня а 19 гадзіне Дзяржаўны літаратурны музей Янкі Купалы запрашае на Купальскаю ноч у Купалавым доме, якая адбудзецца напярэдадні дня нараджэння Янкі Купалы.

Адкрыецца свята інтэрактыўнай гульнёй-віктарынай “У пошуках папараць-кветкі” на прызы ад музея Песняра. Да ўдзелу запрашаюцца сямейныя і сяброўскія каманды, якія з дапамогай пуцяводніка адшукаюць музейныя прадметы ў сучасных экспазіцыйных залах.

У парку імя Янкі Купалы ля ганку музея адбудзецца “Купальская містэрыя” у выкананні гурта “Талака” пад кіраўніцтвам В.В.Калацэя і Т.А.Пладуновай кафедры этналогіі і фальклора Беларускага дзяржаўнага ўніверсітэта культуры і мастацтва.

Удзельнікаў свята чакаюць майстар-класы па пляценні купальскіх вянкоў і старадаўніх песнях і танцах.

УВАХОД – вольны!

02.06.2016
2 чэрвеня 2016 года ў г. Цхалтуба (Грузія) Музей Янкі Купалы прадставіў міжнародны выставачны праект “Грузія, дружная з сонцам краіна”

У Грузіі ў горадзе Цхалтуба адбылося адкрыццё выстаўкі, якая стала часткай гарадскога фестываля, прысвечанага першаму народнаму паэту Беларусі Янку Купалу, які адпачываў тут штогод, з 1937 па 1941 год.

Было люба мне ў Цхалтуба,
У жыватворнай цёплай цхалі,
Было люба, як галубіў
Цябе ў думках, Генацвале.
Янка Купала «Генацвале», 1938

Горад Цхалтуба пакінуў значны след у жыцці і творчасці Песняра. Тут напісаны бадай самыя цёплыя паэтычныя радкі, што выйшлі з-пад яго пяра ў 1930-я гады. Сюды ён прыязджаў з класікам беларускай літаратуры і сваім лепшым сябрам Якубам Коласам. Тут сустракаўся з рускім пісьменнікам А. Новікавым-Прыбоем. Знаёмства з гісторыяй Грузіі, яе фальклорам натхніла Янку Купалу на стварэнне вершаў “Грузія”, “Мы людзі свабодныя”. Але больш за ўсё сэрца паэта закранулі цудоўныя людзі – урачы санаторыя Эліко Метэхелі, якой прысвечаны верш “Генацвале”, Ціна Джавахішвілі і Уладзімір Кікнадзэ, з якімі падарожнічаў па ваколіцах Цхалтуба.

Дзяржаўны літаратурны музей Янкі Купалы выказвае павагу арганізатарам праекта за ўмацаванне беларуска-грузінскіх культурных сувязяў і папулярызацыю спадчыны народнага паэта Беларусі Янкі Купалы ў Грузіі: Марыне Кутатэладзэ, Тамце Вардасанідзэ, Ніно Кучава, Сафіко Мікеладзэ, Вользе Градзінар, мэрыі г. Цхалтуба і асабіста віцэ-мэру Рызо Мэсхі, кіраўніку Цэнтра развіцця культуры і турызма Цхалтубскага муніцыпалітэта Сосо Кучава, менеджэру Цхалтубскага краязнаўчага музея імя Г. Ахвледыяні Іі Кухашвілі.

У выніку выставачнага праекта фонды музея Песняра ў Мінску ўзбагаціліся фотаздымкамі і рэчамі, якія захоўваліся ў сям’і Эліко Метэхелі, і былі перададзеныя яе унукамі — Лэлай і Гіві Курашвілі, які ўразіў веданнем беларускай мовы і паэзіі Янкі Купалы. Шаноўнымі гасцямі фестывалю стала сям’я дыпламата Гочэ Чэлідзэ,  які працаваў у пасольстве Грузіі ў Рэспубліцы Беларусь.

Экспанаванне выстаўкі “Грузія, дружная з сонцам краіна” ў краязнаўчым музеі

імя Г. Ахвледыяні г. Цхалтуба.

Урачыстае адкрыццё выстаўкі.

Ля будынка краязнаўчага музея г. Цхалтуба.

(Злева направа: Вольга Пархімовіч, Ія Кухалашвілі, Лэла Курашвілі,

Марына Кутатэладзэ, Алена Ляшковіч, Гіві Курашвілі, Эліна Свірыдовіч).

На адкрыцці выстаўкі куратары праекта з унукамі Эліко Метэхелі.

Уручэнне дыплома «Сябра музея» Тамце Вардасанідзэ.

Ля магілы Оціа Іаселіані.

Беларускія дні ў г. Цхалтуба.

Майстар-клас па вырабу лялек ад супрацоўнікаў музея Янкі Купалы.

Шчаслівыя ўдзельнікі майстар-класа са сваімі вырабамі.

Беларускія народныя танцы і гульні прыйшліся даспадобы грузінскай моладзі.

Словы запісвалі транслітарацыяй.

Вершы Янкі Купалы гучалі на беларускай, рускай і грузінскай мовах.

  Дырэктар музея Янкі Купалы перадае краязнаўчаму музею г. Цхалтуба каталог                     фотаздымкаў Янкі Купалы, дзе ёсць фотаздымак паэта ў Цхалтуба,                      і муляж аўтографа верша «Генацвале».

Першы ў Беларусі сямейны інклюзіўны тэатр «і» запрашае 3 чэрвеня на прэм’еру свайго дэбютнага спектакля «Флейта-Чарадзейка».

Асаблівасць тэатра ў тым, што на сцэне разам з прафесійнымі акцёрамі выконваць ролі будуць дзеці з аўтызмам. Інклюзіўны тэатр – гэта крок насустрач асаблівым дзецям і спроба зразумець іх унікальнасць, адначасова паказаць, што яны абсалютна нічым не адрозніваюцца ад іншых дзяцей.

Спектакль «Флейта-Чарадзейка»  –  гэта сямейны мюзікл. Сюжэт распавядае пра прыгоды двух дзяцей, якія прыехалі да дзядзькі ў вёску і якія апынуліся ў казачным свеце. Каб выратаваць лес і аднавіць прыродны цыкл, персанажы адпраўляюцца на пошукі чароўнай флейты. Паколькі рэальны і выдуманы свет цесна пераплецены, падарожжы дзяцей прыводзяць да нечаканых наступстваў.

У стварэнні спектакля ўдзельнічалі вопытныя драматургі, акцёры, сцэнарысты і дэкаратары.

Рэжысёрам-пастаноўшчыкам з’яўляецца Ігар Сідорчык – вядомы беларускі драматург. Асноўную сцэнаграфію і дэкарацыі стварыў знакаміты мастак і дэкаратар Веніямін Маршак.

У стварэнні касцюмаў удзельнічаў беларускі куцюр’е Янж Нядвецкі, упрыгожваннямі якога карыстаюцца Джоні Дэп і Лэдзі Гага.

Кошт аднаго квітка складае ад 50 да 200 тыс. беларускіх рублёў. Усе сродкі, сабраныя ад продажу квіткоў на прэм’еру, пойдуць на развіццё тэатра і падтрымку дзяцей з аўтызмам.

Арганізатар праекта – Міжнародная дабрачынная грамадская арганізацыя «Дзеці. Аутызм. Бацькі».

 

09.07.2016

9 ліпеня 2016 года ў Купалаўскім мемарыяльным запаведніку «Вязынка» адбылося традыцыйнае свята паэзіі, песні і народных рамёстваў «З адною думкаю аб шчасці Беларусі…»

Вязынка – калыска паэта: тут, у адным з найпрыгажэйшых куткоў Міншчыны, нарадзіўся Іван Дамінікавіч Луцэвіч. З 1972 года кожнае лета ў пачатку ліпеня Вязынка збірае сяброў, каб адсвяткаваць дзень нараджэння Янкі Купалы. З усяго свету прыязджаюць госці на радзіму беларускага Песняра.

ЗАПРАШАЕМ У ВЯЗЫНКУ!

У творчым пошуку Валерый Вядрэнка прайшоў праз захапленне кінематаграфіяй, жывапісам. Са з’яўленнем сучасных тэхналогій працуе ў галіне лічбавай фатаграфіі. Валерый Вядрэнка ўваходзіць у склад экспертнай камісіі Беларускага грамадскага аб’яднання “Фотамастацтва”, куратар праекта “Сустрэчы з легендамі” і аўтар публіцыстычнай рубрыкі “Лыжка дзёгцю” на фотапартале “ZNYATA”. Работы фотамастака прадстаўлены на шматлікіх фота- і мастацкіх выстаўках, у тым ліку персанальных, на Беларусі і ў замежжы, уваходзяць у склад музейных калекцый.

У праекце “Святло Вязынкі” Валерый Вядрэнка свядома не выкарыстоўвае спецэфекты сучасных тэхналогій, бо, на яго думку, Вязынка, нібы лінза, увабрала рысы многіх беларускіх ландшафтаў: ад балотаў Палесся да ўзгоркаў Паазер’я, ад абшараў Падняпроўя да паэтычных нёманскіх дуброў. У гэтай цудоўнай мясціне ад Купалля да Купалля цягам 30 фотасесій Валерый Вядрэнка карпатліва і чуйна збіраў праявы зменлівасці прыроды, імкнуўся захаваць каларыстычную дакументальнасць пейзажу, натуральнасць і спрадвечнасць гэтай дзіўнай прыроднай прасторы, каб яшчэ раз падкрэсліць, што геній беларускай літаратуры нарадзіўся ва ўнікальнай мясціне нашай зямлі, якая ў любы час года прамяніцца ціхім таямнічым святлом.

Фотавыстаўка працягнецца да 10 кастрычніка 2016 года!

21.05.2016

Міжнародная акцыя Ноч музеяў 2016 прымеркавана да 100-гадовага юбілею вянчання Янкі Купалы і Уладзіславы Станкевіч

Толькі 1 раз у год! Толькі 1 ноч! Толькі 1 тысяча рублёў! «ВЯСЕЛЛЕ.BY» у рамках Міжнароднай акцыі Ноч музеяў 2016 да 100-гадовага юбілею вянчання Янкі Купалы і Уладзіславы Станкевіч!

Незвычайнае свята чакае мінчан і гасцей сталіцы з 19.00 да 24.00 у залах музея і на тэрыторыі парку імя Янкі Купалы:

  • ўрачыстая цырымонія шлюбу ў суправаджэнні духавога аркестра Дзяржаўнага пагранічнага камітэта Рэспублікі Беларусь з уручэннем пасведчанняў і памятных падарункаў для пар, у якіх у 2016 годзе юбілей вяселля, пачатак а 19.00 гадзіне
  • “Вясельны праменад” – паказ асабістых вясельных сукенак, пачатак а 20 гадзіне
  • унікальная выстаўка “Ісці супольна праз усё жыццё”:
  • вясельныя фотаздымкі, ліставанне, вершы-прысвячэнні Янкі Купалы і іншых знакамітых беларускіх паэтаў;
  • фотавыстаўка Джона Кундстатэра “Каб аднойчы..”;
  • акцыя «Чытаем Купалу разам» – вершы паэта з “лірыкі кахання”;
  • майстар-класы:
  • ад прафесійных фларыстаў,
  • па вырабе лялек-абярэгаў,
  • па навязванні наміткі,
  • па старадаўніх вясельных спевах і танцах;
  • “Алея закаханых” – вясельныя фотаздымкі на алеях парка;
  • “Алея Рамёстваў” – майстры прапануюць свае непаўторныя аўтарскія работы;
  • канцэртная праграма ля ганку музея:
  • Кацярына Ваданосава
  • Алесь Камоцкі
  • “AMAROKA”
  • “Re1ikt”
  • “Лепшы квас”
  • “9 Месяцаў Вясны”
  • Аркестар Фішэра

21.04.2016

Адбылася прэзентацыя кнігі вершаў і перакладаў Таццяны Сівец “Разняволенасць”

Таццяна Сівец – пісьменніца, журналістка, сцэнарыст-драматург, сябра Прэзідыума Праўлення Саюза пісьменнікаў Беларусі, вядучая праграмы “Дыяблог. Пра літаратуру” на тэлеканале “Беларусь-3”.

вокладка_1У імпрэзе прынялі удзел прадстаўнікі дыпламатычных місій Азербайджанскай Рэспублікі, Рэспублікі Казахстан, Славацкай Рэпублікі і Украіны, беларускія паэты і перакладчыкі. Госці вечарыны атрымалі магчымасць пачуць творы аўтараў з розных краін у арыгінале і па-беларуску.

Аздаблялі вечарыну работы мастака Аксаны Аракчэевай, у тым ліку дыпціх “Мой Менск”, фрагмент якога быў выкарыстаны на вокладцы кнігі.

Музычным падарункам для аўтара кнігі і ўсіх прысутных стала выступленне ансамбля ўкраінскага хора “Крыніца” пад кіраўніцтвам Маргарыты Кучук.

12.04-26.04.2016

Мастацкая выстаўка Барыса і Аксаны Аракчэевых “Плывуць леты, нібы рэкі…”

Мастацкая выстаўка Барыса і Аксаны Аракчэевых “Плывуць леты, нібы рэкі…”, была прысвечана 90-годдзю заслужанага дзеяча мастацтваў, кавалера ордэна Францыска Скарыны мастака Барыса Уладзіміравіча Аракчэева.

Афіша

Пачынальнік творчай дынастыі Аракчэевых Барыс Уладзіміравіч нарадзіўся 19 красавіка 1926 года. Для Аксаны Аракчэевай, дачкі мастака, таксама мастачкі, стала добрай традыцыяй менавіта ў гэты веснавы час ладзіць своеасаблівую справаздачу для таты і галоўнага настаўніка – сумесную выстаўку твораў.

Сёлета прыхільнікам творчасці Барыса Аракчэева прапануюцца творы, якія яшчэ ніколі не экспанаваліся. Сярод іх эцюды і малюнкі 1950–60-х гадоў, нават заданні па чарчэнню 1952 года, зробленыя падчас навучання ў Мінскай мастацкай вучэльні. Дарэчы, менавіта стварэнне мапаў у часы армейскай службы адыграла галоўную ролю ў вызначэнні лёсу мастака. Сюжэтна-тэматычныя палотны, прадстаўленныя на выстаўцы “Плывуць леты, нібы рэкі…”, – узор уласцівай Барысу Аракчэеву якасці формы, і ў той жа час выраз сутнасці ўспрымання мастаком прыроды і чалавека. Яркі, смелы стыль жывапіснага пісьма ўласцівы менавіта гэтаму майстру – паслядоўніку рускага рэалістычнага мастацтва і французскага імпрэсіянізму.

Аксана Аракчэева прадставіла на выстаўцы і свае творы. Гэта партрэты сяброў мастачкі, зробленыя ў 2015–2016 гг.

22.03.2016

Адбыўся круглы стол «Патэнцыял музейнай педагогікі ў выхаванні асобы»

22 сакавіка ў Дзяржаўным літаратурным музеі Янкі Купалы разам з Пастаяннай камісіяй па адукацыі, культуры і навуцы Нацыянальнага сходу Рэспублікі Беларусь адбыўся круглы стол «Патэнцыял музейнай педагогікі ў выхаванні асобы».

Праблемнае поле:
-музей як сацыяльны інстытут;
-супрацоўніцтва ўстаноў адукацыі і дзяржаўных музеяў у выхаванні асобы;
-музейная педагогіка як інавацыйная выхаваўчая тэхналогія;
-выхаванне асобы сродкамі музейнай педагогікі;
-нарматыўнае прававое забеспячэнне арганізацыі музейнай педагогікі.

16.03.2016

Дзень Канстытуцыі Рэспублікі ў залах Дзяржаўнага літаратурнага музея Янкі Кыпалы

У Дзень Канстытуцыі Рэспублікі Беларусь 15 сакавіка ў залах Дзяржаўнага літаратурнага музея Янкі Купалы пашпарт грамадзяніна нашай краіны атрымалі 20 школьнікаў Цэнтральнага раёна горада Мінска.

Ва ўрачыстасці прынялі ўдзел намеснік старшыні Мінгарвыканкама Ігар Васільевіч Карпенка, начальнік Упраўлення адукацыі, спорта і турызма Адміністрацыі Цэнтральнага раёна г. Мінска Валянцін Мікалаевіч Канаплёў. Аздобілі мерапрыемства музычныя і вакальныя нумары ад Цэнтра дадатковай адукацыі дзяцей і моладзі “Кантакт” г. Мінска.

04.03. — 10.04.2016

Выстаўку “Узнагароды краін свету” з фондаў Тракайскага гістарычнага музея, якая арганізавана пры падтрымцы Пасольства Літоўскай Рэспублікі ў Рэспубліцы Беларусь.

Тракайскі гістарычны музей існуе ўжо 77 гадоў. За гэты час сабраныя значныя калекцыі, якія адлюстроўваюць развіццё дзяржаўнасці Літвы і гісторыю Тракая. У калекцыі фалерыстыкі, якая налічвае звыш 25 тысяч адзінак, побач з дзяржаўнымі ўзнагародамі Літвы захоўваюцца разнастайныя ўзнагароды краін свету. Для выстаўкі “Узнагароды краін свету” выбраныя больш за 120 ордэнаў і медалёў з 41 дзяржавы Еўропы, Азіі, Афрыкі, Паўночнай і Паўднёвай Амерыкі. Большую частку – 31 экспанат – складаюць старыя і новыя ўзнагароды Літоўскай Рэспублікі.

На выстаўцы былі прадстаўлены ўзнагароды незалежнай Беларусі з фондаў Нацыянальнага гістарычнага музея Рэспублікі Беларусь, а таксама ўзнагароды Народнага паэта Беларусі Янкі Купалы з фондаў музея Песняра. Падчас вернісажу адбудзецца прэзентацыя каталога выстаўкі.

Выстаўка “Узнагароды краін свету” была рэалізавана ў рамках дамовы аб супрацоўніцтве Дзяржаўнага літаратурнага музея Янкі Купалы і Тракайскага гістарычнага музея, пазней яна будзе экспанавацца ў музеях Гродна, Магілёва, Віцебска, Гомеля, у музеі-сядзібе М.К.Агінскага ў в. Залессе. Партнерам выстаўкі выступіла кампанія “Белдзяржстрах”.

У 2016 годзе, які быў аб’яўлены Годам культуры, гэты яскравы выставачны праект, які аб’яднае музеі Літвы і Беларусі, садзейнічаў далейшае ўмацаванне добрасуседскіх стасункаў паміж краінамі ў галіне гісторыі і культуры.

20.01.2015
Прэзентацыя каталога афіш да спектакля “Паўлінка” 

Янка Купала стаяў ля вытокаў нацыянальнай драматургіі, стварэння і развіцця беларускага тэатра. Трыумфам беларускага тэатральнага мастацтва стала знакамітая камедыя Янкі Купалы “Паўлінка”, з моманту напісання якой (1912) прамінула больш 100 гадоў! Большасць матэрыялаў, якія звязаны з гісторыяй напісання п’есы і стварэннем спектакля, захоўваюцца ў фондах Дзяржаўнага літаратурнага музея Янкі Купалы. Каталог афіш да спектакля “Паўлінка” Янкі Купалы – унікальнае выданне для гісторыі тэатральнага мастацтва, для кожнага тэатра, які ставіў п’есу Песняра.

19.02.2015
Музейны праект “У дыялогу культур”

Традыцыйны музейны праект “У дыялогу культур”, прысвечаны Міжнароднаму дню роднай мовы, які быў абвешчаны Генеральнай канферэнцыяй ЮНЕСКА 17 лістапада 1999 года з мэтай садзейнічання захаванню моўнай і культурнай разнастайнасці і шматмоўя, і адзначаецца 21 лютага.

Янка Купала як нацыянальны класік далучыў беларускую культуру да сусветнай, дзякуючы яго творчасці беларускую літаратуру ведаюць у многіх краінах свету. Акцыя “У дыялогу культур” стала ў музеі Песняра традыцыйнай і адбываецца з удзелам прадстаўнікоў дыпламатычнага корпусу, акрэдытаванага ў Рэспубліцы Беларусь.

19.03.2015
Прэзентацыя шрыфта “Рiasniar” (лічбавая копія почырка Янкі Купалы)

Да 110-годдзя творчай дзейнасці народнага паэта Беларусі Янкі Купалы створаны шрыфт “Рiasniar” – лічбавая копія яго почырка.Падставай для стварэння шрыфту паслужылі аўтографы Янкі Купалы, большая частка якіх увайшла ў рукапісны варыянт трэцяга зборніка вершаў “Шляхам жыцця”, які захоўваецца ў фондах музея.

Стварэнне шрыфту – унікальная падзея ў гісторыі беларускай сучаснай культуры. Спадзяемся, што шрыфт натхніць людзей прыўнесці ў сваё жыццё частку беларускага нацыянальнага каларыту і з гонарам пісаць аб сваёй любові да Бацькаўшчыны і да беларускай мовы почыркам Янкі Купалы!

Спампаваць шрыфт можна на сайце piasniar.by.

17.04.2015
Адкрыццё выстаўкі жаночага партрэта мастака Аксаны Аракчэевай  
“Купалінкі”

 На выстаўцы прадстаўлены партрэты тых, хто стаяў ля вытокаў стварэння музея: першы дырэктар Уладзіслава Луцэвіч, пляменніца паэта Ядзвіга Раманоўская, якая доўгія гады была галоўным захавальнікам фондаў, унучатая пляменніца Янкі Купалы Жанна  Дапкюнас, якая працягвала справу У.Ф.Луцэвіч, а таксама партрэты тых, хто з’яўляецца добрым пераймальнікам традыцый: супрацоўніцы музея Песняра, таму выстаўка і атрымала назву “Купалінкі”.

24-27.04.2015
Конкурс творчых работ “Купаляняты”

Да 70-годдзя Вялікай Перамогі і да Года моладзі Дзяржаўны літаратурны музей Янкі Купалы пры падтрымцы Камітэта адукацыі г. Мінска правёў фінал гарадскога конкурсу творчых работ “Купаляняты”.

Пераможцы былі вызначаны ў двух намінацыях:

“Лепшы чытальнік вершаў” – па творах Янкі Купалы і іншых беларускіх паэтаў, прысвечаных падзеям Вялікай Айчыннай вайны (для вучняў 5-11 класаў)

“Лепшы казачнік” (для вучняў 1-4 класаў) на лепшае напісанне і прэзентацыю казкі.

У журы конкурсу былі запрошаны акцёры Нацыянальнага акадэмічнага тэатра імя Янкі Купалы, Рэспубліканскага тэатра беларускай драматургіі, члены Саюза пісьменнікаў Беларусі.

15.04.2015
Адкрыццё выставы «Я буду жыць!»

Да 110-годдзя напісання верша «Мужык». Выданне адбылося 15 мая 1905 года ў Мінску ў газеце «Северо-Западный край». Менавіта з гэтай даты пачынаецца адлік творчай дзейнасці народнага паэта Беларусі Янкі Купалы. Рукапіс верша «Мужык» і яго першая публікацыя беражліва захоўваюцца ў Музеі Песняра.

16.05.2015
“Вакол свету за адну ноч” у рамках Міжнароднай акцыі “Ноч музеяў”

Акцыя дала магчымасць пазнаёміцца з песеннай і танцавальнай культурай 15 краін, з якімі звязана імя народнага паэта Беларусі Янкі Купалы: Расія, Украіна, Літва, Славакія, Чэхія, Грузія, Арменія, Кітай, ЗША, Ізраіль, Бразілія, Індыя, Татарстан, Польшча і, вядома, Беларусь!

25.05.2015
Адкрыццё выстаўкі “Завуся я толькі Янка Купала…” (г. Талін, Эстонія)

Выстаўка адкрыта пры падтрымцы Пасольства Рэспублікі Беларусь у Эстонскай Рэспубліцы у Дзень беларускай культуры ў рамках Дзён славянскага пісьменства і культуры ў Рускім культурным цэнтры г. Талін (Эстонія).

Выстаўка “Завуся я толькі Янка Купала”, прымеркаваная да 110-годдзя з пачатку творчай дзейнасці Янкі Купалы (1882–1942), знаёміць з жыццёвым і творчым шляхам першага народнага паэта Беларусі і дае ўнікальную магчымасць эстонскаму гледачу больш даведацца пра класіка беларускай літаратуры і ўбачыць ілюстрацыі да кніг Янкі Купалы, што ўвайшлі ў залаты фонд беларускай кніжнай графікі ХХ – пачатку ХХI стагоддзя.

19.06.2015
Адкрыццё выстаўкі “Аспазія/Райніс: мяцежніца/гуманіст. Гісторыя двух латышскіх паэтаў

Выстаўка прымеркавана да 150-годдзя Яна Райніса і Аспазіі, класікаў латышскай літаратуры, паяднаных талентам, шчырай адданасцю роднай зямлі і сумесным жыццёвым лёсам.

Выстаўка створана ў рамках праграмы публічнай дыпламатыі і культуры старшыньства Латвіі ў Савеце Еўрапейскага Саюза. З 20 па 24 красавіка 2015 года выстаўка была экспанавана ў Salle des Pas Perdus – у галоўным будынку UNESCO ў Парыжы. Арганізатары і партнёры выставачнага праекта – Аб’яднанне мемарыяльных музеяў Латвіі, Пасольства Латвійскай Рэспублікі ў Рэспубліцы Беларусь, Сакратарыят старшыньства Латвіі ў Савеце Еўрапейскага Саюза, Латвійская Нацыянальная камісія UNESCO, Музей літаратуры і музыкі (Рыга).

Прарокаў беларускага і латышскага нацыянальнага адраджэння зблізіла непахісная вера ў будучыню сваіх народаў.

21-28.06.2015
Міжнародны культурна-адукацыйны праект “Славацкімі шляхамі Янкі Купалы”

Праект быў ажыццёўлены да 80-годдзя візіту ў Славакію першага народнага паэта Беларусі Янкі Купалы ў складзе афіцыйнай дэлегацыі савецкіх пісьменнікаў і журналістаў 15-19 кастрычніка 1935 года. Праз восемдзесят гадоў шляхам паэта па гарадах Браціслава, Святы Юр, Модра, Пешцяны, Марцін, Высокія Татры праехала дэлегацыя беларускіх пісьменнікаў і журналістаў.

05.07.2015
Свята паэзіі, песні і традыцыйных рамёстваў “З адною думкаю аб шчасці Беларусі”

Свята ладзіцца на тэрыторыі Купалаўскага мемарыяльнага запаведніка “Вязынка” (Мінская вобласць, Маладзечанскі раён) сумесна з Маладзечанскім райвыканкамам і Саюзам пісьменнікаў Беларусі.

Вязынка – калыска паэта: тут, у адным з найпрыгажэйшых куткоў Міншчыны, нарадзіўся Іван Дамінікавіч Луцэвіч. З 1972 года кожнае лета ў пачатку ліпеня Вязынка збірае сяброў, каб адсвяткаваць дзень нараджэння Янкі Купалы. З усяго свету прыязджаюць госці на радзіму беларускага паэта.

06.07.2015
“Святкуем Купалле разам з Купалам”

Свята прымеркавана да дня нараджэння Янкі Купалы і праводзіцца на базе Рэспубліканскага тэатра беларускай драматургіі. Перад праглядам спектакля “Адвечная песня” паводле драматычнай паэмы Янкі Купалы гледачы прынялі ўдзел у акцыі “Чытаем Купалу разам” і ў майстар-класе па купальскіх песнях і танцах ад фальклорна-этнаграфічнага калектыва “GUDA”.

07.07.2015
Паэтычны мітынг “Палымянае слова паэта”

Штогод у Дзень нараджэння народнага паэта Беларусі Янкі Купалы ў парку яго імя адбываецца паэтычны мітынг “Палымянае слова паэта” і цырымонія ўскладання кветак да помніка Песняру.

09.10.2015
Падпісанне пагаднення аб супрацоўніцтве паміж Дзяржаўным літаратурным музеем Янкі Купалы і Федэральнай нацыянальна-культурнай аўтаноміяй “Беларусы Расіі”

У Расіі і сёння захоўваецца ўдзячная памяць пра беларускага песняра Янку Купалу. Яго творы перакладаюцца на рускую мову, яму прысвячаюць вершы. У 2006 годзе на Кутузаўскім праспекце ў Маскве быў урачыста адкрыты помнік першаму народнаму паэту Беларусі працы беларускіх скульптараў Льва і Сяргея Гумілеўскіх.

У Рэспубліцы Татарстан, у пасёлку Пячышчы, з 1975 года прымае наведвальнікаў кватэра-музей паэта. Вялікі ўклад ва ўвекавечванні памяці Янкі Купалы належыць беларускай дыяспары за мяжой.

Пагадненне аб супрацоўніцтве было падпісана дырэктарам Дзяржаўнага літаратурнага музея Янкі Купалы Аленай Раманаўнай Ляшковіч і Старшынёй Федэральнай нацыянальна-культурнай аўтаноміі Беларусаў Расіі Сяргеем Львовічам Кандыбовічам.

24.10.2015
“Пасвячэнне ў гімназісты”

Дзяржаўны літаратурны музей Янкі Купалы ўвесь час працуе над пашырэннем праграмы ўзаемадзеяння музея і школы. Напачатку 2015-2016 навучальнага года была падпісана дамова аб супрацоўніцтве паміж Гімназіяй  № 37 г. Мінска і музеем Песняра, у рамках якой адбылося “Пасвячэнне ў гімназісты” вучняў 5 класаў.

Падчас урачыстаці для дзяцей, бацькоў і настаўнікаў была арганізавана інтэрактыўная праграма з пошукам музейных экспанатаў, віктарынамі, загадкамі, майстар-класамі, падарункамі і сюрпрызамі. Кульмінацыяй імпрэзы стане ўручэнне канфедэратак і складанне клятвы гімназіста.

23.11.2015
Падпісанне пагаднення аб супрацоўніцтве з Тракайскім гістарычным музеем

23 лістапада Дзяржаўны літаратурны музей Янкі Купалы падпісаў пагадненне аб супрацоўніцтве з Тракайскім гістарычным музеем. У лютым 2016 года ў Мінску адбыўся ўнікальны міжнародны выставачны праект «Узнагароды», дзе прадставілі калекцыю ордэнаў і медалёў з 35 краін свету. Сярод гэтых узнагарод быў ордэн Леніна і медаль «За абарону Масквы» Янкі Купалы.

15.12.2015
Адкрыццё новай літаратурна-дакументальнай экспазіцыі Купалаўскага мемарыяльнага запаведніка “Ляўкі” (Віцебская вобласць, Аршанскі раён)

У новай экспазіцыі часткова адноўлены інтэр’ер пакоя былой сядзібы Копыскага лясніцтва, у якім жыў Янка Купала і, натхнёны падзеямі і сустрэчамі ў Ляўках, стварыў васемнаццаць вершаў “ляўкоўскага цыкла”. Атмасферу Ляўкоў часоў Янкі Купалы перадаюць аудыязапісы голасу Песняра, музычныя творы на яго словы, народная музыка, спевы птушак.

16.12.2015
Праект “Закуліссе”

У Рэспубліканскім тэатры беларускай драматургіі перад праглядам спектакля “АДВЕЧНАЯ ПЕСНЯ”, паводле драматычнай паэмы Янкі Купалы, музей прапанаваў гледачам праверыць сваю эрудыцыю і паспрабаваць адказаць на пытанні віктарыны “Цікавыя факты жыцця і творчасці Песняра”, і атрымаць каштоўныя падарункі ад музея Янкі Купалы і Рэспубліканскага тэатра беларускай драматургіі.

Па заканчэнні спектакля ў кожнага была ўнікальная магчымасць прыняць удзел у праекце ”ЗАКУЛІССЕ”: пагутарыць з акцёрамі тэатра і задаць ім свае пытанні.

29.12.2015
Адкрыццё памятнага знака Янку Купалу ў г. Ашдод (Ізраіль)

Напрыканцы 2015 года адбылася значная культурная падзея ў гісторыі ўшанавання памяці Янкі Купалы – урачыстае адкрыццё памятнага знака Янку Купалу ў г. Ашдод (Ізраіль). Гэта другі помнік Песняру ў далёкім замежжы (у 1973 годзе быў адкрыты помнік Янку Купалу ў Ароў — парку ў ў штаце Нью-Ёрк у Злучаных штатах Амерыкі). У Доме культуры г. Ашдод была адкрыта выстаўка з фондаў музея “Сад вашых песень” і праведзена грамадска-культурная акцыя “Чытаем Купалу разам”.

21-30.12.2015
“Калядкі ў Купалавым доме”. 21-30 снежня 2015 года

Для маленькіх сяброў музея была падрыхтавана цікавая святочная праграма, падчас якой дзеці даведаліся: як адзначалі Каляды ў Беларусі на працягу апошніх 100 гадоў, павадзілі карагоды з калядоўшчыкамі і Казой, паспявалі ды патанчылі, прынялі ўдзел у актыўных гульнях, паглядзелі лялечны спектакль “У пошуках Снягуркі”, атрымалі падарунак ад Снягурачкі. Правядзенне Калядак у Купалавым доме, у тым ліку і дабрачынных, – добрая традыцыя музея.