Категория: 2018 год

“Пасвячэнне ў першакласнікі”

Каб восень запомнілася першакласнікам як пара святочных падзей, цікавых адкрыццяў і сустрэч, запрашаем правесці “Пасвячэнне ў першакласнікі” у Дзяржаўным літаратурным музеі Янкі Купалы!
Праграма мерапрыемства распрацавана ў фармаце падарожжа каманд з капітанамі па 8 залах музея, падчас якога дзеці даведаюцца: хто такі Янка Купала і што ён напісаў для дзяцей, як жылі беларусы 100 гадоў таму, якія ветлівыя словы трэба казаць пры сустрэчы і на развітанне, і многае іншае.
Кожны з удзельнікаў свята атрымае падарунак ад музея з сімволікай свята!

25 кастрычніка прайшоў літаратурны вечар прысвечаны 90-годдзю народнага пісьменніка Кыргызстана, дыпламата Чынгіза Айтматава.

Яшчэ пры жыцці Айтматаў, які пісаў на рускай і кыргызскай мовах, стаў класіком сусветнай літаратуры. Рэалістычная проза пісьменніка прасякнута ідэямі гуманізма і вялікай любоўю да ўсяго жывога, і ставіць актуальныя пытанні экалогіі планеты і душы чалавека.

Творы Чынгіза Айтматава перакладзены на 150 моў свету. На беларускай мове да юбілея пісьменніка выйшла другое выданне рамана          “І вякуе дзень даўжэй за век” у перакладзе Міхася Стральцова. Маналог Едыгея з рамана прагучыць падчас вечарыны ў выкананні акцёра Нацыянальнага драматычнага тэатра імя М.Горкага Валерыя Шушкевіча.

У адным з інтэрв’ю Чынгіз Айтматаў сказаў, што любіць слухаць велічную музыку Баха, а яшчэ песню, якая ў выкананні Марка Бернеса ўвайшла ў сэрцы многіх людзей ва ўсім свеце, – “Жураўлі” на словы сябра Расула Гамзатава. Літаратурны вечар упрыгожыць канцэртная праграма выкладчыкаў Беларускай дзяржаўнай акадэміі музыкі.

У творах Чынгіз Айтматаў выказваў сваё меркаванне і пра сённяшні дзень, і пра будучыню, гаворачы пра высокія духоўныя каштоўнасці як аснову сутнасці чалавека. Пра веліч творчага таленту пісьменніка распавядзе старшы выкладчык кафедры рускай літаратуры БДУ Аляксандр Гарбачоў.

За ўклад у развіццё культуры цюркамоўных краін урад Турцыі не толькі надаў Чынгізу Айтматаву вышэйшую ўзнагароду, але і наменаваў пісьменніка на Нобелеўскую прэмію.

Вечарына адбудзецца пры падтрымцы Пасольства Кыргызскай Рэспублікі ў Рэспубліцы Беларусь у рамках экспанавання выстаўкі “Шляхі мовы і літаратуры”, на якой прадстаўлена творчасць Янкі Купалы, Яна Райніса, Аляксандра Пушкіна, Ёнаса Майроніса, Крысціёнаса Данелайціса, Адама Міцкевіча – лепшых творцаў сваіх народаў. Для кыргызаў – гэта Чынгіз Айтматаў.

“Шляхамі мовы і літаратуры”

19 кастрычніка 2018 г. у Музеі літоўскай літаратуры імя Майроніса (г. Каўнас, Літоўская Рэспубліка) адбылося ўрачыстае адкрыццё шостага этапу Міжнароднага выставачнага праекта “Шляхамі мовы і літаратуры” (Беларусь–Латвія–Літва–Польшча–Расія), які створаны сумесна музеямі-партнёрамі ў рамках Еўрапейскага года культурнай спадчыны. Дэвіз праекта – “Захоўваем спадчыну” – сугучны мэце ЕГКС: павышэнне дасведчанасці пра багацце культурнай спадчыны і яе ролі для фарміравання пачуцця агульнай ідэнтычнасці і для будучыні Еўропы. Кожны музей-удзельнік зберагае спадчыну знакавых для нацыянальнай культуры паэтаў-класікаў – Крысціёнаса Данелайціса, Яна Райніса, Адама Міцкевіча, Аляксандра Пушкіна, Янкі Купалы, Яніса Майроніса. Асноўная задача праекта – прадставіць спадчыну нацыянальных паэтаў у кантэксце еўрапейскага літаратурнага працэсу; пазнаёміць жыхароў кожнай краіны з асобай і творчасцю паэтаў, палепшыць разуменне агульнага і разнастайнага ў культурах краін-суседак.

Дзяржаўны літаратурны музей Янкі Купалы ў рамках праекта падрыхтаваў тэматычны комплекс “Янка Купала – пясняр Беларусі”, які знаёміць з асобай паэта як прарока нацыянальнага адраджэння і яго ўкладам у развіццё міжкультурнага паэтычнага дыялогу. Матэрыялы выстаўкі прадстаўляюць формы зберажэння і папулярызацыі Купалавай спадчыны ў складзе музейных калекцый, экспазіцый, мемарыялізацыю мясцін, звязаных з яго жыццём і творчасцю, а таксама інавацыйную моладзевую ініцыятыву – праект “Шрыфт PIASNIAR”.

У кожнай з краін праект праводзіцца на нацыянальнай мове, і ў Каўнасе шматлікія госці пазнаёміліся з ім на меладычнай мове класіка літоўскай літаратуры Яніса Майроніса.

Першы этап праекта ажыццяўляў Калінінградскі абласны гісторыка-мастацкі музей, другі – Аб’яднанне мемарыяльных музеяў Латвіі, трэці – Музей літаратуры імя Адама Міцкевіча (Варшава), чацвёрты –Літаратурны музей А.С. Пушкіна (Вільнюс), пяты – Дзяржаўны літаратурны музей Янкі Купалы.

 

2 кастрычніка 2018 года быў усталяваны і адкрыты мемарыяльны знак Янку Купалу ў Фінляндыі, г. Іматра.

Міжнародны культурны праект па ўшанаванні першага народнага паэта Беларусі Янкі Купалы быў рэалізаваны па ініцыятыве Дзяржаўнага літаратурнага музея Янкі Купалы пры падтрымцы Пасольства Рэспублікі Беларусь у Фінляндскай Рэспубліцы.

Мемарыяльны знак, створаны скульптарам Паўлам Вайніцкім, – памятка аб візіце Янкі Купалы ў Фінляндыю ў 1910 годзе, дзе паэтам быў створаны верш-балада “Над Іматрай”, прысвечаны сусветна вядомаму вадаспаду на рацэ Вуокса. Пра гэту яркую старонку біяграфіі паэта распавядала і выстаўка з фондаў музея, створаная ў рамках міжнароднага праекта “Янка Купала ў дыялогу культур”, якая экспанавалася ў Мэрыі.

Урачыстая цырымонія адбылася на цэнтральнай плошчы г. Іматра з удзелам супрацоўнікаў дыпламатычнай місіі, прадстаўнікоў Мэрыі, жыхароў і гасцей горада.  Мэр Кай Рослакка падкрэсліў, што міжнародны культурны праект па ўшанаванні памяці беларускага паэта Янкі Купалы спрыяе міжкультурнаму дыялогу паміж народамі Беларусі і Фінляндыі і з’яўляецца цудоўным падарункам да 70-годдзя Іматры, якую  называюць нацыянальным цудам Фінляндыі.

Вялікі гонар для беларусаў, што імя Янкі Купалы шырока вядома ў свеце. Гэтаму спрыяюць шматлікія мерапрыемствы па ўшанаванні паэта, сярод якіх адкрыццё помнікаў, мемарыяльных дошак і знакаў маюць вельмі важнае значэнне.

 

Цяпер і на беразе ракі Вуокса ля вадаспада Іматра ў Фінляндыі можна прачытаць наступныя радкі на фінскай і беларускай мовах:

Народны паэт Беларусі Янка Купала

ў 1910 годзе наведаў гэтыя мясціны

і стварыў натхняльны верш “Над Іматрай”.

Свабодай сваёю і роднай Суомі

Сягнуць быццам хочуць да зор.

 

 

4 кастрычніка адббылося адкрыццё пятага этапа Міжнароднага выставачнага праекта шасці музеяў з пяці краін «Шляхамі мовы і літаратуры», прымеркаванага да Года еўрапейскай культурнай спадчыны

Пашырыць дасведчанасць людзей пра багацце культурнай спадчыны Еўропы, яе ролю ў фарміраванні пачуцця агульнай ідэнтычнасці, развіцці грамадства, далучыць да місіі захавання і вывучэння здабыткаў еўрапейскай культуры максімальна шырокую аўдыторыю і найперш моладзь, захаваўшы пераемнасць пакаленняў, – мэты Года. Дзяржаўны літаратурны музей Янкі Купалы, Калінінградскі абласны гісторыка-мастацкі музей (Расія), Аб’яднанне мемарыяльных музеяў (Рыга, Латвія), Музей літоўскай літаратуры імя Майроніса (Каўнас, Літва), Літаратурны музей А.С. Пушкіна (Вільнюс, Літва), Музей літаратуры імя Адама Міцкевіча (Варшава. Польшча) захоўваюць спадчыну паэтаў, што не толькі вызначалі шляхі развіцця нацыянальных літаратур, але паспрыялі ўсведамленню і ўмацаванню нацыянальнага адзінства сваіх народаў, сталі іх духоўнымі прадстаўнікамі ў свеце. Паэтычны скарб, створаны Янкам Купалам, Адамам Міцкевічам, Аляксандрам Пушкіным, Янісам Райнісам, Крысціёнасам Данелайцісам, Янісам Майронісам – каштоўная частка агульнай еўрапейскай культурнай спадчыны, іх пісьменніцкі і жыццёвы лёс паяднаны шматлікімі творчымі стасункамі, а для Міцкевіча і Пушкіна, Купалы і Райніса – блізкім асабістым знаёмствам. Паэтаў лучыла і імкненне не толькі захаваць культурныя набыткі свайго краю, але пазнаёміць з імі далёкіх і блізкіх суседзяў, пракладаючы шляхі для дыялогу розных культур.

Праект, які аб’яднаў музеі пад лозунгам “Захоўваем спадчыну”, працягвае і развівае гэты творчы дыялог. У шырокім кантэксце еўрапейскага літаратурнага працэсу ён прадстаўляе спадчыну нацыянальных геніяў, кожны з якіх стаў візітнай карткай сваёй краіны, дазваляе паглыбіць разуменне агульнага і разнастайнага ў культурах краін-суседак, формы зберажэння і папулярызацыі спадчыны паэтаў у складзе музейных калекцый, экспазіцый, мемарыялізацыю мясцін, звязаных з іх жыццём і творчасцю. Выстаўкі праекта з поспехам прайшлі ў Калінінградзе, Юрмале, Варшаве, Вільнюсе. Цяпер Мінск прадстаўляе шэсць скарбніц мастацкага слова з пяці еўрапейскіх краін, якія даюць магчымасць прайсці “Шляхамі мовы і літаратуры” разам са славутымі Песнярамі сваіх народаў.

Наведаць выстаўку можна да 27 кастрычніка 2018 года.

Дырэктар Дзяржаўнага літаратурнага музея Янкі Купалы Ляшковіч Алена

Дырэктар Аб’яднання мемарыяльных музеяў Латвіі Рыта Мэйнэрт

Дырэктар Музея літоўскай літаратуры імя Майрониса Альдона Русецкайте

Намеснік дырэктара па навуковай рабоце Калінінградскага абласнога гісторыка-мастацкага музея Вольга Шчаглова

Галоўны спецыяліст па супрацоўніцтве з знешнімі айчыннымі і замежнымі арганізацыямі Літаратурнага музея імя Адама Міцкевіча Катажына Якімяк

Дзень беларускага пісьменства

“Ачуняць, глянуць па-арлінаму смела,

дружна на свет белы, загаманіць праўдай

цэламу свету громка, свабодна мы зможам

толькі тады, калі пад саламянымі стрэхамі

нашых хат зойме пачэснае месца наша

родная беларуская кніжка.”

                                                    Янка Купала

 

1-2 верасня музей прымаў удзел у Днях беларускага пісьменства ў г. Янаў Брэсцкай вобласці з грамадска-культурнай акцыяй “Чытаем Купалу разам” у рамках выставачнага праекта “Абуджаная жалейка”, прысвечанага цыклу патрыятычных вершаў Янкі Купалы 1918 года і прымеркаванага да 110-годдзя выхаду першага зборніка “Жалейка”.

6 верасня адбылася прэзентацыя кнігі Тамары БУНТА “Чароўны кошык»

Кніга выйшла ў 2018 годзе ў выдавецтве “Мастацкая літаратура”. Ілюстрацыі да кнігі стварыла вядомая беларуская мастачка Аксана АРАКЧЭЕВА.

Новы зборнік дзіцячай пісьменніцы Тамары Бунта склалі пятнаццаць  апавяданняў, героямі якіх з’яўляюцца сучасныя дзеці з іх радасцямі і крыўдамі, перамогамі і расчараваннямі, пошукамі і стратамі. Кніга разлічана для дзяцей малодшага школьнага ўзросту

Тамара Пятроўна Бунта – вядомы журналіст, працавала ў розных беларускіх выданнях. У 2003 – 2014 гадах была галоўным рэдактарам часопіса жанчын Беларусі “Алеся” (былая назва – “Работніца і сялянка”). З’яўляецца аўтарам шматлікіх артыкалаў, прысвечаных тэме дзяцінства, мацярынства, грамадскай дзейнасці жанчын. Узнагароджана Знакам “Выдатнік друку Беларусі”. Член ГА “Саюз пісьменнікаў Беларусі”, член праўлення ГА “Беларускі саюз жанчын”. З’яўляецца старшынёй Клуба творчых жанчын “Спадарыня”, створанага пры СПБ і БСЖ.

У прэзентацыі прымуць удзел:

БАДАК Алесь Мікалаевіч – дырэктар выдавецтва “Мастацкая літаратура”, паэт, лаўрэат міждзяржаўнай прэміі “Зоркі Садружнасці”;

БАБРОВА Анастасія Леонідаўна – актрыса Рэспубліканскага тэатра беларускай драматургіі;

ДРАНЬКО-МАЙСЮК Васіль Леанідавіч – драматург, пісьменнік, літаратурны крытык;

ЕРМАКОВА Надзея Андрэеўна – намеснік старшыні ГА “Беларускі саюз жанчын”;

ЛІПСКІ Уладзімір Сцяпанавіч – галоўны рэдактар часопіса для дзяцей “Вясёлка”, пісьменнік, лаўрэат Дзяржаўнай прэміі Рэспублікі Беларусь;

МАЗГО Уладзімір Мінавіч – намеснік галоўнага рэдактара часопіса “Нёман”, паэт, перакладчык, член Рады Мінскага гарадскога аддзялення ГА “Саюз  пісьменнікаў Беларусі”, кіраўнік секцыі дзіцячай літаратуры СПБ;

ЦЫБУЛЬСКІ Кастусь Пятровіч – паэт-песеннік;

Узорны фальклорны ансамбль “КАЛЫХАНКА” а.г. Міханавічы Мінскага раёна, кіраўнік Ларыса РЫЖКОВА

30 жніўня 2018 года адбылося адкрыццё выставачнага праекта “Крывіцкая мекка”.

Упершыню ў Беларусі экспануюцца цікавыя матэрыялы віленскага перыяду са збораў Дзяржаўнага літаратурнага музея Янкі Купалы, прыватнай калекцыі Ірыны Ніжанкоўскай – унучатай пляменніцы Аляксандра Уласава.Плануецца прадставіць рарэтэты з фондаў Грамадскай арганізацыі “Беларускі музей імя Івана Луцкевіча” (Вільнюс, Літва) і Музея гісторыі горада Мінска. Подробнее

Нашы віншаванні!

Калектыў Дзяржаўнага літаратурнага музея Янкі Купалы сардэчна віншуе Народнага артыста Беларусі Віктара Манаева з 60-годдзем з дня нараджэння!

Для нас Вы заўсёды з’яўляецеся прыкладам вялікай духоўнасці і высакароднасці служэння Беларусі. Ваша акцёрская праца ўзбуджае пачуццё любові і павагі да роднай беларускай зямлі.

Заставайцеся і надалей шчырым беларусам, сейце свае залатыя зярняты творчасці, што ўзрастуць у сэрцах Вашых гледачоў.

Зычым Вам моцнага здароўя, доўгіх год жыцця, штодзённай асалоды ад працы!

“Меер Аксельрод. Кніжная графіка”

“Меер Аксельрод. Кніжная графіка” – да 115-годдзя мастака ладзіцца выстаўка яго твораў, якія захоўваюцца ў нашчадкаў багатага на таленты роду Аксельродаў: братоў Зэліка, Меера і Залмана звязвала з Янкам Купалам творчае сяброўства і захапленне паэзіяй, мастацтвам і кінадакументалістыкай.

Будуць прадстаўлены ілюстрацыі да кніг Янкі Купалы, Змітрака Бядулі, Якуба Коласа, Ізі Харыка, Зеліка Аксельрода, а таксама замалёўкі даўняга Мінска.

Выстаўка ў Дзяржаўным літаратурным музеі Янкі Купалы працуе з 7 па 25 жніўня 2018 года.

« Предыдущие записи Следующие записи »