Навіны і падзеі

Віншуем!

Музей : 31.10.2019 15:07 : Навіны музея

Калектыў Дзяржаўнага літаратурнага музея Янкі Купалы сардэчна віншуе сябра музея, выдатнага скульптара, народнага мастака Беларусі Льва Мікалаевіча Гумілеўскага з 89‑годдзем! Ваш дар удыхнуў жыццё ў бронзу, захаваўшы для нашчадкаў абліччы слаўных сыноў і дачок беларускай зямлі. Шчыра жадаем Вам шчасця, здароўя, энергіі, творчага натхнення!

Комментировать »

1 лістапада ў г. Пліска (Балгарыя), у гісторыка-культурным комплексе “Двор кірыліцы”, быў адкрыты помнік-бюст Янку Купалу

Музей : 31.10.2019 14:33 : Навіны музея

Паэт, драматург, публіцыст, ён абудзіў Беларусь да новага жыцця, у сваіх творах адкрыў душу беларуса, яго памкненні і мары. Пісьменнік быў голасам свайго народа не толькі на радзіме, але і ў свеце. Яшчэ пры жыцці ён стаў для беларусаў прарокам, духоўным лідарам, сімвалам адданага служэння Бацькаўшчыне, а ў свеце для многіх знаёмства з нашай краінай, яе гісторыяй і культурай пачынаецца з Купалавых вершаў.

Творчая спадчына Янкі Купалы ўвайшла ў залаты фонд беларускай літаратуры, стала неад’емным складнікам славянскай і еўрапейскай культуры. У Балгарыі яна набыла вядомасць ужо з сярэдзіны мінулага стагоддзя дзякуючы руплівай працы перакладчыкаў, якія перастварылі на балгарскай мове такія шэдэўры, як паэмы “Адвечная песня”, “Курган”, “Яна і я”, п’есу “Паўлінка”, шматлікія вершы. Жаданымі гасцямі былі балгарскія пісьменнікі на святкаванні 100-годдзя беларускага паэта ў Вязынцы.

Ушанаванне беларускага класіка на балгарскай зямлі – сведчанне плённага развіцця беларуска-балгарскага культурнага дыялогу, каштоўны знак сяброўства і павагі да нашай культуры і гісторыі. Дзяржаўны літаратурны музей Янкі Купалы і Пасольства Беларусі ў Балгарыі выступілі ініцыятарамі і каардынатарамі праекта. Мецэнатам – стваральнік гісторыка-культурнага комплекса “Двор кірыліцы” спадар Карэн Алексанян. Помнік створаны беларускім скульптарам Уладзімірам Слабодчыкавым. Урачыстасць адбудзецца з удзелам дыпламатычных прадстаўнікоў Рэспублікі Беларусь, супрацоўнікаў музея і аўтара помніка.

 

Комментировать »

Спачуванні!

Музей : 28.10.2019 16:17 : Навіны музея

Калектыў Дзяржаўнага літаратурнага музея Янкі Купалы смуткуе ў сувязі з заўчаснай смерцю выдатнага кампазітара-песенніка Алега Моўчана і выказвае шчырыя спачуванні родным і блізкім. Яго цудоўныя песні – светлы дар таленту і шчырай любові да роднай зямлі. Нам будзе не ставаць творцы, які раскрыў веліч Купалавай “Малітвы”, даў непаўторны музычны голас вершам “Родныя песні”, “Дзве таполі”, “Песня мая”.

Вечная памяць.

Комментировать »

ХІІІ Міжнародныя Купалаўскія чытанні

Музей : 18.10.2019 15:06 : Навіны музея

23–24 кастрычніка ў Дзяржаўным літаратурным музеі Янкі Купалы прайшлі

 ХІІІ Міжнародныя Купалаўскія чытанні“НАМ ЗАСТАЛАСЯ СПАДЧЫНА”

 да 75-годдзя заснавання Дзяржаўнага літаратурнага музея Янкі Купалы

 

Традыцыйная міжнародная навуковая канферэнцыя, арганізаваная Купалаўскім музеем і Міжнародным фондам Янкі Купалы, была прысвечана творчасці і грамадскай дзейнасці Янкі Купалы, яго ролі ў фарміраванні беларускай нацыянальнай ідэнтычнасці, рэцэпцыі нацыянальнай культурнай спадчыны ў сучасным свеце. Музеязнаўчая секцыя разгледзела праблемы і перспектывы развіцця сучаснага літаратурнага музея, яго ролю ў захаванні, інтэрпрэтацыі і папулярызацыі спадчыны выбітных творцаў.

23 кастрычніка 2019 года а 17.00 адбылася прэзентацыя беларускага нумара часопіса “NAPÚT” (Будапешт), які пазнаёміў венгерскага чытача з гісторыяй і культурай Беларусі, з творчасцю Янкі Купалы: змешчаны 4 варыянты перакладу верша “А хто там ідзе?” і пераклад першай часткі п’есы “Тутэйшыя”. Выданне прадставілі галоўны рэдактар Дзьёрдзь Сонды і перакладчык Петар Барас.

24 кастрычніка 2019 года прайшла канферэнцыя. Свае даклады  прадставілі як беларускія навукоўцы, так і даследчыкі з Расіі, Венгрыі, Латвіі, Польшчы, падчас пленарнага паседжання і ў рамках работы секцый абмеркаваўшы розныя аспекты купалазнаўства, музеефікацыі і актуалізацыі спадчыны Янкі Купалы, літаратурнага музеязнаўства.

У рамках канферэнцыі прэзентаваны выставачны праект да 110-годдзя прыезду Янкі Купалы ў Пецярбург “Душой я вольны чалавек”, які ўпершыню экспанаваўся на пляцоўцы Усерасійскага музея А. С. Пушкіна ў час VII Санкт-Пецярбургскага міжнароднага культурнага форуму (2018).

 

 

Комментировать »

ІV Нацыянальны форум «Музеі Беларусі»

Музей : 07.10.2019 17:18 : Навіны музея

Музей Янкі Купалы прыняў удзел у ІV Нацыянальным форуме «Музеі Беларусі» і стаў адным з лідараў па колькасці атрыманых узнагарод:

  • Спецыяльны дыплом журы ў намінацыі «За лепшае прадстаўленне музея на экспазіцыі форуму»
  • Дыплом ІІІ ступені ў намінацыі «За лепшае музейнае выданне»
  • Дыплом I ступені ў намінацыі «За навацыі ў музейнай дзейнасці»

Дзякуем журы, віншуем калег і чакаем гасцей форуму ў нашым музеі!

 

 

 

Комментировать »

Новы музейна-педагагічны занятак“Багач” для дзяцей малодшага школьнага ўзросту

Музей : 03.10.2019 11:53 : Анонс падзей, Навіны музея

Мы і з сошкай ішлі, і з баронкай ішлі

Заслужыцца на ласку ў цябе…

(Янка Купала “Хлеб”) Даведацца больш »

Комментировать »

1 кастрычніка рабочы дзень музея пачаўся з візіта Надзвычайнага і Паўнамоцнага Пасла Рэспублікі Карэя ў Рэспубліцы Беларусь Спадара Чжун Ёль ТХЭ

Музей : 01.10.2019 15:04 : Навіны музея

Комментировать »

Музею-75!

Музей : 24.09.2019 16:19 : Навіны музея

“З Купалам у сэрцы” – так называўся ўрачысты вечар, прысвечаны 75-гадоваму юбілею Дзяржаўнага літаратурнага музея Янкі Купалы, які музей адзначыў 23 верасня 2019 года.

Сімвалічна, што свята супрацоўнікі Купалавага дому сустракалі на сцэне гасціннага і дабразычлівага Нацыянальнага акадэмічнага тэатра імя Янкі Купалы. Як сказаў аднойчы народны артыст Беларусі Віктар Манаеў: “музей і тэатр, дзякуючы Янку Купалу – сваякі”. Атмасфера тэатра ў гэты дзень напоўнілася асаблівай душэўнай цеплынёй і сардэчнасцю.

Высокая ацэнка дзейнасці музея прагучала ў Віншавальным адрасе ад Прэзідэнта Рэспублікі Беларусь А.Р.Лукашэнкі. Калектыў ўстановы “Дзяржаўны літаратурны музей Янкі Купалы” атрымаў Падзяку Прэм’ер-Міністра Рэспублікі Беларусь С.М.Румаса за значны ўклад у захаванне і папулярызацыю беларускай нацыянальнай культуры.

Музей з юбілеем павіншавалі Першы намеснік міністра культуры Рэспублікі Беларусь Н.В. Карчэўская, намеснік міністра замежных спраў Рэспублікі Беларусь А.В. Дапкюнас, начальнік упраўлення выдавецкай і паліграфічнай дзейнасці Міністэрства інфармацыі Рэспублікі Беларусь У.У.Андрыевіч,  Генеральны дырэктар Нацыянальнага акадэмічнага тэатра імя Янкі Купалы П.П. Латушка, Старшыня Мінскай гарадской арганізацыі Беларускага прафесійнага саюза работнікаў культуры, інфармацыі, спорта і турызма С.Р.Крысенка, прагучалі відэавіншаванні ад Надзвычайных і Паўнамоцных Паслоў Рэспублікі Беларусь у Кітаі і Фінляндыі, а таксама ад беларусаў Аргенціны і калег з музея Янкі Купалы ў сяле Пячышчы, Рэспубліка Татарстан.

У канцэртнай праграме вечара прынялі ўдзел любімы намі народны артыст СССР, народны артыст Беларусі Генадзь Сцяпанавіч Аўсяннікаў з вершам-дэбютам Янкі Купалы “Мужык”, бліскучы акцёрскі дуэт славутага спектакля “Паўлінка” Алег Гарбуз і Юлія Шпілеўская пры падтрымцы артыстаў аркестра выканалі ўрывак з легендарнага твора, а таксама заслужаны артыст Рэспублікі Беларусь Ігар Сігоў, які непаўторна ўвасобіў вобраз Мужыка з драматычнай паэмы “Адвечная песня”.

У святочнай праграме прагучалі песні на словы Янкі Купалы ў выкананні Аляксандра Віслаўскага, а таксама Беларускага дзяржаўнага ансамбля “Песняры”.

“Спадчына”, пакладзеная на музыку Ігарам Лучанком, у выкананні лаўрэата і дыпламанта міжнародных конкурсаў Ільі Сільчукова стала прыемным падарункам ад Нацыянальнага акадэмічнага Вялікага тэатра оперы і балета Рэспублікі Беларусь.

Упершыню з вялікай сцэны прагучаў гімн Купалавага дому на словы Навума Гальпяровіча і музыку Алеся Камоцкага ў выкананні ўсіх супрацоўнікаў музея – гэта стала адным з самых кранальных момантаў свята, бо ўсе 200 чалавек, які знаходзіліся ў зале, слухалі гімн стоячы!

Шмат шчырых слоў і віншаванняў прагучала ў гэты цудоўны вечар. Юбілей – выдатная магчымасць прыгадаць яркія моманты жыцця музея, сабраць разам былых супрацоўнікаў і сяброў – усіх, хто жыве і працуе з Купалам у сэрцы!

Прытулак любові – Купалаўскі Дом,

Дзе зноў зажадалі сустрэцца.

З Купалам у сэрцы усе мы жывём.

З Купалам – у сэрцы!

Комментировать »

Увага! 23-га верасня музей працуе да 15:00

Музей : 23.09.2019 10:19 : Навіны музея
Комментировать »

17 верасня 2019 года адбылося адкрыццё выстаўкі “Мяжа была пад Мінскам. 1921–1941”

Музей : 11.09.2019 09:43 : Навіны музея

Выставачны праект беларускага гісторыка Ігара Мельнікава прысвечаны гісторыі міжваеннай польска-савецкай мяжы ў Беларусі.

На працягу апошніх 10 гадоў даследчык ладзіў экспедыцыі, вывучаў асаблівасці функцыянавання мяжы паміж Польшчай і БССР. Плён палявых даследванняў – вялікая калекцыя артэфактаў, фотаздымкаў і дакументальных матэрыялаў, што ўвайшлі ў кнігі “Мяжа ля Заслаўя 1921–1941 гг.” (2015) і “Мяжа была пад Мінскам 1921–1941 гг.” (2017).

Госці выстаўкі ўпершыню ў Беларусі ўбачаць сотні ўнікальных экспанатаў – памятак той цяжкой эпохі, калі Беларусь была падзелена паміж Савецкім Саюзам і Другой Рэччу Паспалітай. Асаблівую цікавасць выклікаюць дакументы, якія рэгламентавалі знаходжанне грамадзян у памежнай зоне, пашпарты і даведкі. Адмысловы раздзел прысвечаны барацьбе з кантрабандыстамі і працы польскай і савецкай выведкі.

Асаблівую ўвагу аўтар надае падзеям 17 верасня 1939 года на “мяжы цывілізацый”, калі Чырвоная Армія распачала “вызвольны паход” у Заходнюю Беларусь. Тады даваенная мяжа ператварылася ў “зону загароды”, якую аж да чэрвеня 1941 года ахоўвалі савецкія памежнікі, якія пасля нападу нацысцкай Германіі на СССР мужна змагаліся супраць ворага на “старой мяжы”.

Выставачны праект “Мяжа была пад Мінскам. 1921–1941” на аснове аўтэнтычных экспанатаў дазваляе паглыбіць веды і зразумець феномен даваеннай савецка-польскай мяжы, якая наклала вялікі адбітак на лёс беларускага народа і дзяржавы.

Праект прысвечаны 80-й гадавіне пачатку Другой сусветнай вайны і накіраваны на захаванне гістарычнай памяці пра тыя падзеі.

Комментировать »
« Старонка 1, 2, 3 ... 14, »