Навіны і падзеі

24 сакавіка запрашаем пагукаць вясну ў Вязынцы

Музей : 18.03.2019 15:38 : Навіны музея

Фота Аксаны Ярашонак

Студэнцкае этнаграфічнае таварыства і Дзяржаўны літаратурны музей Янкі Купалы зноў запрашаюць усіх у Вязынку (Маладзечанскі раён) пагукаць вясну разам,піша Рэгіянальная газета.

Свята зладзяць 24 сакавіка. Пачатак — у 13.00.

У праграме:

  • веснавыя песні на гары
  • карагоды разам з усімі ўдзельнікамі свята
  • гульні для моладзі і дзяцей
  • традыцыйная музыка
  • танцы
  • кірмаш рамёстваў

Даехаць да Вязынкі можна або ўласным транспартам, або электрычкай з Мінска і Маладзечна

https://nn.by/?c=ar&i=226869

Комментировать »

Свята “Паклон табе – вялікі наш Кабзар”

Музей : 28.02.2019 14:54 : Навіны музея

2 cакавіка 2019 года Дзяржаўны літаратурны музей Янкі Купалы і Мінскае грамадскае аб’яднанне ўкраінцаў “Заповіт” адзначылі свята да 205-годдзя з дня нараджэння Тараса Шаўчэнкі,  пры падтрымцы Пасольства Украіны ў Рэспубліцы Беларусь.

Імя Тараса Шаўчэнкі, агорнутае асаблівай любоўю і хвалой, навекі стала нацыянальнай святыняй і гонарам. Яго слава з кожным годам шырыцца і па-за межамі роднай Украіны. Адным з першых творы Кабзара, якога лічыў духоўным настаўнікам, перакладаў на беларускую мову Янка Купала. Абодва народныя паэты стваралі новую нацыянальную літаратуру, змагаліся за духоўнае адраджэнне і незалежнасць сваіх народаў.

Вершы Тараса Шаўчэнкі прачытаюць прадстаўнікі розных пакаленняў украінскай дыяспары з Культурна-асветнага грамадскага аб’яднання ўкраінцаў “Обрій” (г. Калодзшчы), МГАУ “Заповіт”. Да іх далучацца дзеці акрэдытаваных у Беларусі ўкраінскіх дыпламатаў Дзмітрый Цвердахлеб, Артур Ляшэнка, Ганна Шапіра і Маргарыта Андрэйчук.

Вершы народнага паэта Беларусі Янкі Купалы “Памяці Шаўчэнкі” і ўрывак з паэмы “Тарасова доля” прачытае акцёр Алег Вінярскі.

У канцэртнай праграме запланаваныя выступленні фальклорнага ансамбля ўкраінскай песні і абрадаў пад кіраўніцтвам Аляксандра Валодчанкі “Ватра”, які выканае песні на словы Шаўчэнкі “Думи мої, думи”, “Пливи, пливи, лебідь”, “По діброві вітер виє”. Тэнар Мікіта Ядлоўскі, а таксама заслужаны студэнцкі хор Мінскага дзяржаўнага педагагічнага ўніверсітэта ім. М. Танка “Gaudeamus”, якім кіруе Ларыса Ядлоўская, выканаюць украінскія народныя песні “Цвіте терем”, “Праля”, “Порізала пальчик”, “Туман яром”.

На ўрачыстае завяршэнне свята ўсе яго ўдзельнікі выканаюць знакамітую песню на словы Шаўчэнкі “Реве та стогне Дніпр широкий“.

 

Комментировать »

“Старасвецкая Лошыца”

Музей : 21.02.2019 12:36 : Навіны музея

Дзяржаўны літаратурны музей Янкі Купалы выказвае шчырую ўдзячнасць Кур’яновічу Юрыю Уладзіміравічу, пісьменніку, перакладчыку, гісторыку, мастаку за кнігу “Старасвецкая Лошыца”, перададзеную ў дар музею. Кніга распавядае пра гісторыю Лошыцкага маёнтка, лёс якога звязаны са шматлікімі імёнамі славутых людзей, сярод якіх – прадстаўнікі шляхецкіх родаў Прушынскіх, Друцкіх-Горскіх, вядомыя навукоўцы Мікалай Вавілаў, Аляксей і Эма Сюбаравы, Анатоль Валузнёў, пісьменнік Вінцэнт Дунін-Марцінкевіч і інш. Кніга дазваляе таксама прыадкрыць і яшчэ адну малавядомую старонку жыцця Янкі Купалы, даведацца пра людзей, з якімі наш паэт разам працаваў, з кім сустракаўся і сябраваў.

У час працы над кнігай Кур’яновіч Ю.У. звяртаўся да матэрыялаў Нацыянальнага архіва Рэспублікі Беларусь і Нацыянальнага гістарычнага архіва Беларусі. Сярод дакументаў Нацыянальнага архіва Рэспублікі Беларусь і быў выяўлены вельмі каштоўны для купалазнаўцаў дакумент, раней невядомы рукапіс Івана Луцэвіча (Янкі Купалы), датаваны 6 жніўня 1920 г. – заява Яраслава Ясінскага аб прыёме на працу ў Мінскі губернскі зямельны аддзел з рэкамендацыямі С.Некрашэвіча і Янкі Купалы.

Янка Купала асабіста ведаў Яраслава Ясінскага па сумеснай працы ў Народным камісарыяце асветы ССРБ, і ў рэкамендацыі падкрэсліваў: “Тав. Ясінскага знаю як самага акуратнага і сумленнага працаўніка, якому можна даверыць самую адказную працу”. Добрым словам паэт успомніў Я.Ясінскага і ў пісьме ў рэдакцыю газеты “Беларусь”, дзе дзякаваў за дапамогу, аказаную падчас хваробы: “Вельмі паважаны Пане Рэдактар! Не адкажыце надрукаваць у Вашай газеце гэтых колькі слоў. 9 студзеня г.г. я цяжка захварэў… У часе гэтай маёй хваробы шмат асоб аказалі мне па-праўдзе братнюю помач і апеку. …Не магу не ўспомніць добрым словам д-ра Малькевіча, які на кватэры аказаў мне першую помач, а так жа прафесара Іваноўскага, Б.Тарашкевіча, Ясінскага, Ерохава і інш., што сваімі рукамі на насілках занеслі мяне з кватэры аж у бальніцу”.

Кніга “Старасвецкая Лошыца” Ю.У.Кур’яновіча – адзінае выданне, дзе ўпершыню друкуецца Заява Я.Ясінскага аб прыёме на працу ў Мінскі губернскі зямельны аддзел з рэкамендацыямі С.Некрашэвіча і Янкі Купалы, што значна павялічвае яе каштоўнасць.

Аўтару гэтага цікавага даследавання “Старасвецкая Лошыца” – Юрыю Уладзіміравічу  Кур’яновічу – хочацца пажадаць далейшых поспехаў у сваіх даследаванях, новых знаходак і адкрыццяў, і нараджэння новых кніг.

 

З удзячнасцю, КУПАЛАЎЦЫ

Комментировать »

Запрашаем наведаць выставачны праект “Дрэвы, якія памятаюць Купалу”, падрыхтаваны Дзяржаўным літаратурным музеем Янкі Купалы сумесна з Беларускім грамадскім аб’яднаннем фатографаў

Музей : 14.02.2019 17:31 : Навіны музея

Час не пашкадаваў многія сядзiбы, хаты, фальваркі, праз якія прайшоў жыццёвы шлях Янкі Купалы. Але ўважлівы падарожнік, вандруючы па купалаўскіх мясцінах, яшчэ можа адшукаць рэшткi алей i паркаў, i старыя дрэвы, якiя здолелi перажыць катастрафiчныя падзеi гiсторыi i надвор’я.

Дрэвы – дубы, лiпы, ясенi, клёны, таполi, яблынi – апеты ў шматлiкiх радках i творах Янкі Купалы. З дзён, калі іх бачыў паэт, мінула 100 і болей гадоў. За свой доўгі век гэтыя дрэвы змянілі абрысы сваіх крон, падняліся вышэй у нябёсы, многія з іх надаюць непаўторны каларыт наваколлю. Ідэя захаваць у здымках іх веліч і хараство аб’яднала кола фотамастакоў, якія выпраўляліся ў падарожжы з вясны па восень 2018 года.

Марына Бацюкова, Вячаслаў Бахметаў, Яўген Гараўскi, Жанна Мяленцьева, Вольга Сяргеева і куратар праекта Альберт Цэхановiч прэзентуюць плён сваіх вандровак – серыi i асобныя фотаздымкi, прысвечаныя як добра вядомым купалаўскiм мясцiнам – Харужанцы, Бяларучы, Карпiлаўка, так і менш вядомым – Ручын, Косiна, Юзафова, Гаяны, Сёмкава і інш. Выкананыя ў ручных аўтарскiх тэхнiках друку гэтыя работы адлюстроўваюць непаўторнае аблічча жывых дрэваў, што распавядаюць уласную быль цi казку і таму, хто гатовы слухаць, раскрываюць таямніцу Купалавага натхнення.

Выстаўка мастацкай фатаграфіі “Дрэвы, якія памятаюць Купалу” працуе да 6 сакавіка 2019 года па адрасе Мінск, вул. Янкі Купалы, 4.

Комментировать »

7 лютага 2019 года ў Дзяржаўным літаратурным музеі Янкі Купалы ў рамках XXVI Мінскай Міжнароднай кніжнай выстаўкі-кірмашу адбыліся 2 прэзентацыі

Музей : 01.02.2019 12:11 : Анонс падзей, Навіны музея

Даведацца больш »

Комментировать »

Купалаўцы святкуюць 100-годдзе прыезду Паэта ў Мінск!

Музей : 21.01.2019 16:44 : Навіны музея

Сёння, 21 студзеня 2019 года, купалаўцы пілі святочную гарбату з адмысловых кубачкаў з аўтографам паэта – адзначалі 100-годдзе прыезду Янкі Купалы ў Мінск на сталае месца жыхарства.

Далучайцеся!!! Рабіце сэлфі з кубачкам гарбаты і размяшчайце ў сацыяльных сетках з #Kupala100Minsk #ЛюблюКупалу

Комментировать »

Адкалядавалі! Час гукаць вясну!

Музей : 18.01.2019 17:12 : Навіны музея

Інтэрактыўная праграма “Калядкі ў Купалавым доме” у снежні 2018 і студзені 2019 года ладзілася рэкордную колькасць разоў – 58! Яе ўбычыла амаль 3000 чалавек, ад якіх мы пачулі многа цёплых і добрых слоў! Дзякуй усім вялікі!

Цікава, што распачалі і завяршылі праграму дабрачынныя Калядкі:

  • 13 снежня 2018 года музей далучыўся да рэспубліканскай дабрачыннай акцыі «Нашы сэрцы – дзецям», якая праводзілася ў рамках агульнарэспубліканскай акцыі «Нашы дзеці» Беларускім дзіцячым фондам. На свята ў музей прыехалі 50 дзяцей-сірот з дзіцячых дамоў сямейнага тыпу Магілёўскай і Віцебскай вобласці, а таксама юныя мінчане з прыёмных і шматдзетных сем’яў.
  • 17 студзеня 2019 года шэсць супрацоўнікаў музея, якія ўдзельнічаюць у праграме, паехалі з ёй і, канешне, з падарункамі ў госці ў Аддзяленне дзённага знаходжання для інвалідаў Завадскога раёна г. Мінска.

Дабрачынная праграма была арганізавана двойчы і для Асацыяцыі шматдзетных бацькоў Завадскога раёна, а яшчэ музей меў гонар прымаць удзельнікаў міжнароднага фестываля “Калядныя вечары на Залатой горцы” – узорны калектыў “Перлінка” пад кіраўніцтвам Маі Сайпель (Украіна, Хмельніцкая вобласць).

У гэтым годзе, як і заўсёды, мы прасілі дзяцей пісаць пажаданні ўсім людзям з Калядамі і Новым годам! Часта жадалі проста Шчасця, але цікава, што варыяцый напісання аднаго гэтага слова мы налічылі ажно 40!!!

Усміхніцесь і Вы:

  1. Щястья
  2. Щастя
  3. Щастье
  4. Щчасьтя
  5. Щасте
  6. Щастья
  7. ЩRСЬТЬR
  8. Щастие
  9. Щясьтье
  10. Счястья
  11. Счастя
  12. Счасця
  13. ᴐчаᴐтья
  14. Шчасьтя
  15. Шчасць
  16. Шчасцья
  17. Шчасця
  18. Шчасьтья
  19. Шчасцця
  20. Шчасцасце
  21. Шастя
  22. Шастья
  23. Шчасте
  24. Шчастья
  25. Шчашця
  26. Стящтя
  27. Сястя
  28. Счасце
  29. Сшасья
  30. С частья
  31. Счасця
  32. Счаштья
  33. Стечте
  34. Счасцья
  35. Счасте
  36. Сшасця
  37. Сичасця
  38. Сщастья
  39. Сщчастья
  40. Счастьстя

 

З 1 лютага пачынаем гукаць вясну! Запрашаем! Далучайцеся!

Комментировать »

Запрашаем разам гукаць Вясну!!!

Музей : 15.01.2019 17:22 : Анонс падзей, Навіны музея

“Гуканне вясны” адзін з самых жыццярадасных і аптымістычных беларускіх звычаяў. Пасля доўгай зімы мы чакаем прыгажуню-вясну, каб паскорыць яе прыход і ладзіцца свята. Даведацца больш »

Комментировать »

2019 год музей Янкі Купалы пачаў з сустрэчы ганаровых гасцей

Музей : 14.01.2019 09:21 : Навіны музея

2 студзеня да нас завітала Часовы Павераны ў справах Злучаных Штатаў Амерыкі ў Беларусі Джэніфер Мур.
Навуковыя супрацоўнікі музея падрыхтавалі для спадарыні Мур цікавую праграму: акрамя традыцыйнай экскурсіі па экспазіцыі музея “Шляхі”, госця патрапіла на беларускія Калядкі.
Дыпламат адзначыла, што засталася ў захапленні ад пачутага і ўбачанага падчас экскурсіі, якая пашырыла яе веды пра аднаго з лепшых беларускіх паэтаў, і згадала свой любімы верш Янкі Купалы “Маладая Беларусь”. А на елачцы, якую ствараюць наведвальнікі музея, з’явілася яшчэ адна далонь – спадырыні Джэніфер Мур – з пажаданнямі міра, шчасця і росквіту!

Комментировать »

Калектыў Дзяржаўнага літаратурнага музея Янкі Купалы віншуе ўсіх лаурэатаў прэміі «За духоўнае адраджэнне» і Спецыяльных прэмій Прэзідэнта Беларусі дзеячам культуры і мастацтва!

Музей : 10.01.2019 17:09 : Навіны музея

Ганарымся і віншуем Барткову Марыю Мікалаеўну, загадчыка аддзела навукова-экспазіцыйнай і выставачнай работы, якая ў складзе калектыва Секцыі па перакладзе літургічных тэкстаў і афіцыйных дакументаў Касцёла камісіі Божага культу і дысцыпліны сакрамэнтаў пры Канферэнцыі Каталіцкіх Біскупаў у Беларусі, спрычынілася да з’яўлення беларускага тэксту Новага Запавету, перакладзенага з арыгінальных моў і зацверджанага афіцыйна. Сімвалічна, што выданне ўбачыла свет у год 500-годдзя Бібліі Францішка Скарыны.

Комментировать »
« Старонка 1, 2, 3 ... 15, »