Творчасць Янкі Купалы ад першага і да апошняга радка належыць Беларусі і яе нацыянальнай культуры.

Творы паэта сталі своеасаблівым мастом, што злучыў беларускую культуру з культурай сусветнай. Яны ўвабралі ў сябе лепшыя здабыткі жывой беларускай культуры, мовы, мыслення, сталі паэтычным увасабленнем Беларусі.

Купалава творчасць заслужыла сусветнае прызнанне — пра гэта сведчыць шырокі грамадскі рэзананс, які яна выклікала ў многіх краінах. Творы беларускага песняра перакладзены амаль на 100 замежных моў. Толькі верш «А хто там ідзе?» гучыць на 84 мовах народаў свету.

Янка Купала і сёння народны Прарок, Пясняр, Паэт для кожнага з беларусаў.