шрыфт «Пясняр»
Каляндар падзейПадчас правядзення інтэрактыўных музейных заняткаў часта здараюцца вельмі смешныя выпадкі:
Настаўніца вучням: “Как вы себя ведёте? Вы же в приличное место пришли, а не в школу!”
Занятак “Калядкі ў Купалавым доме”. Вядучы задае пытанне, а 6-гадовыя дзеці адказваюць:
— Больш чым дзве тысячы гадоў таму нарадзіўся сын Божы. Як яго звалі?
— Янка Купала!!!
Пытанне ад вядучага:
– Дзеці, кім вы будзеце працаваць пасля вучобы?
Адказы былі розныя, але часцей гучала: “вецерынарам”.
– А хто ж будзе лячыць людзей?
– Я, – крычыць 6-гадовая дзяўчынка.
– Якім доктарам будзеш?
– Паталагаанатамам!!!
Занятак “Калядкі ў Купалавым доме”. Дзяўчынка вельмі прыгожа танчыла з Казой.
Калядоўшчык кажа:
– Прасі ў Казы што любіш: сала ці цукерку!
– Я люблю сукенкі!
Група кітайскіх студэнтаў ля сувенірнага кіёска музея:
– Дайте нам, пожалуйста, стихотворение Янки Купалы в переводе на русский язык.
– Какое?
– Называется “Пешком”.
Доўга не маглі здагадацца, што госці з Кітая мелі на ўвазе знакаміты верш Янкі Купалы “А хто там ідзе”.
Падчас інтэрактыўнай музейнай праграмы “Гуканне вясны”:
1) Вядучы:
– Дзеці, мы сёння будзем “гукаць вясну”, бо на календары 2 сакавіка, а на вуліцы мароз, ляжыць снег і дзьме халодны вецер.
Семігадовая дзяўчынка дадае:
– Вясной і не пахне!!!
2) Вядучы:
– Вясну на сваіх крылах прыносяць птушкі. Хто з вас ведае хаця б адну птушку, якая жыве на Беларусі? Падыміце руку ўверх!
Адзін хлопчык не ўзнімае руку. Вядучы пытаецца:
– Ты ніколі не бачыў голуба?
Раптам усе дзеці прыснулі са смеху і крычаць:
– У яго прозвішча – Голуб!!!
А настаўніца скрозь смех дадае:
– У нас яшчэ і Салавей ёсць!
Вядучы:
– У вас не клас, а нейкая птушыная акадэмія!
Экскурсавод паказвае экскурсантам-студэнтам асабістыя рэчы Янкі Купалы, сярод якіх вось такі прадмет, і пытаецца пра яго назначэнне.
Першай дае адказ 17-гадовая дзяўчына
– Для ўдалення куцікулы!!!
Тэлефонны званок у музей:
– Гэта музей Якуба Коласа?
– Не, гэта музей Янкі Купалы.
– А якая розніца!?
Падчас анкетавання студэнтаў:
– Вы б часцей наведвалі музей, калі б…
– Быў культурыстам.
Падчас абароны экскурсіі студэнтам-практыкантам:
– У доме Янкі Купалы заўсёды чакалі гасцей і нікога не адпускалі без пачастункаў. Можа таму Уладзіслава Францаўна (жонка паэта) штодня гатавала ежу для 25 чалавек.
– Янка Купала сачыў за сваёй фігурай і фізічнай формай, так як з’яўляўся самым сапраўдным моднікам.
Падчас правядзення музейна-педагагічнай праграмы “Гуканне вясны” выбралі на ролю Ярылы хлопчыка, вучня 2 класа:
– Мая мама будзе рада, што я сягоння быў Богам!
Падчас правядзення музейна-педагагічных заняткаў з дзецьмі малодшага школьнага ўзросту:
– Качка – гэта…
– Калі качае.
– Што такое кашуля?
– Кошелёк.
– Якая самая галоўная навагодняя песня?
– Гімн.
– Чым Ясь Луцэвіч у дзяцінстве асвятляў свой пакой?
– Святой вадой.
– Як звалі лепшага сябра Янкі Купалы?
– ЯкубА Коласа.
Падчас правядзення тэматычнай экскурсіі па паэме Янкі Купалы “Курган”:
– Гусляра разам з гуслямі жыўцом паклалі ў зямлю, але народ не забыў свайго героя і...
– Адкапаў.
