Асноўнай мэтай новай літаратурна-дакументальнай экспазіцыі філіяла з’яўляецца раскрыццё вобраза Дома, напоўненага цяплом і ўтульнасцю для беларускага песняра Янкі Купалы, які ператварыўся ў “алтар” Творчасці для Паэта – выразніка духу свайго народа, стваральніка паэтычнага партрэта Айчыны ў эпоху духоўнага адраджэння беларускай нацыі, першых крокаў да атрымання Беларуссю ўласнай дзяржаўнасці.

Аўтарам мастацкай канцэпцыі экспазіцыі стаў Аляксандр Давідовіч. Каля будынка бруіцца крынічка, а побач узведзены крыж у памяць аб былой сядзібе Міхалішкі. За невялікім гаем, на паляне, размешчаны летні амфітэатр. Недалёка ад музея наведвальнікаў сустракае кампазіцыя “Малады Купала” (скульптары А. Заспіцкі, Г. Мурамцаў).

Экспазіцыя складаецца з дзвюх частак:

• Мемарыяльная: на месцы колішняга фальварка Акопы, які з 1909 г. арандавала маці паэта Б. І. Луцэвіч і які пасля 1917 г. перайшоў да яе ва ўласнасць.
• Літаратурна-дакументальная: на месцы колішняга хутара Міхалішкі, які згадваецца ў “Паўлінцы” (цяпер – вёска Харужанцы).

Важныя даты

05.09.1989 г.

Філіял “Акопы” заснаваны паводле загаду №141 Міністэрства культуры БССР.

1991 г.

У вёсцы Харужанцы быў узведзены драўляны будынак, дзе ў 5 залах размясцілася літаратурна-дакументальная экспазіцыя, што знаёміць наведвальнікаў з лагойскім перыядам жыцця і творчасці Янкі Купалы і раскрывае значэнне Купалавых шэдэўраў для будучых пакаленняў.

29.08.1992 г.

Філіял адкрыты для наведвальнікаў у гонар 110-й гадавіны з дня нараджэння паэта.

31.12.2019 г.

Адкрылася новая літаратурна-дакументальная экспазіцыя філіяла Акопы.

---

Загадчык філіяла

Гурэцкая Алена Васільеўна