У экспазіцыі выкарыстаны алічбаваныя матэрыялы:

• Рукапісы Янкі Купалы і фатаграфіі з фондаў Дзяржаўнага літаратурнага музея Янкі Купалы.
• Копіі дакументаў з Нацыянальнага гістарычнага архіва Беларусі.

Кожны экспазіцыйны комплекс суправаджаецца паэтычнымі радкамі Янкі Купалы і фрагментамі яго аўтабіяграфічных лістоў.

У пакоі, дзе ў 1881–1883 гг. жыла сям’я Луцэвічаў, і сенцах узноўлены тагачасны інтэр’ер. Атмасферу даўняга побыту ствараюць аўтэнтычныя рэчы канца ХІХ - пачатку ХХ стагоддзя, сабраныя ў ваколіцах Вязынкі.

У будынку свірана дзейнічае сезонная экспазіцыя «Народныя святы ў творчасці Янкі Купалы».

Важныя даты

4 жніўня 1945 г.

Філіял «Вязынка» заснаваны паводле пастановы ЦК КП(б)Б і СНК БССР № 1139-292 «Аб увекавечанні памяці Народнага паэта Беларусі Янкі Купалы».

20 чэрвеня 1948 г.

Філіял адкрыты для наведвальнікаў.

1972 г.

Створаны Купалаўскі мемарыяльны запаведнік «Вязынка».

Паводле архіўных дакументаў і ўспамінаў старажылаў Вязынкі рэстаўравана хата, у якой у 1882 г. нарадзіўся будучы паэт, створана новая экспазіцыя (мастакі Э. Агуновіч, У. Капшай).

На тэрыторыі запаведніка пачалі праводзіць Рэспубліканскія святы паэзіі, песні і народных рамёстваў да дня нараджэння народнага паэта Беларусі.

1976 г.

На тэрыторыі запаведніка пачалі праводзіць традыцыйныя злёты студэнтаў-філолагаў БДУ.

1992 г.

Рэканструкцыя будынка свірана.

2010 г.

На тэрыторыі запаведніка пачалі праводзіць фінальныя канцэрты конкурсу аўтарскай песні «Купалаўскія вакацыі», а таксама каляндарныя народныя святы.

2012 г.

Да 130-годдзя з дня нараджэння Янкі Купалы праведзена мадэрнізацыя літаратурна-дакументальнай часткі экспазіцыі (мастак Г. Чысты), што прысвечана нараджэнню чалавека і нараджэнню паэта і ахоплівае адпаведна перыяд з 1882 па 1904 г. — час станаўлення асобы Яна Луцэвіча.